Rama: Spektri politik është i bashkuar për të vepruar pas vendimeve të Hagës

Deputeti i Partisë Demokratike të Kosovës, Rrahman Rama, ka bërë të ditur se nga konsultimet e deritanishme është konstatuar një vullnet i përbashkët edhe te subjektet e tjera politike për të ndërmarrë çdo hapi të nevojshëm institucional ndaj vendimeve të Gjykatës Speciale në Hagë, me synim që vendi të dalë sa më i mbrojtur nga ky cikël gjyqësor. Gjatë një prononcimi televiziv, ligjvënësi i PDK-së ka nënvizuar se Projektligji për ndryshimin e Ligjit për Dhomat e Specializuara nuk duhet të trajtohet si nismë partiake, por si një çështje e interesit mbarëkombëtar që kërkon mbështetjen e gjerë të parlamentarëve. “Ky nuk është ligj i PDK-së, është ligj i të gjithëve. Ne po kërkojmë nga të gjithë deputetët e Kuvendit të Kosovës që ta votojnë atë dokument. Kjo nuk bëhet për përfitime politike apo elektorale të partisë sonë”, u shpreh Rama gjatë paraqitjes së tij në media. Më tej, ai shtoi se përshtypjet nga takimet e zhvilluara dëshmojnë një gatishmëri unanime për të bashkërenduar veprimet institucionale lidhur me këtë proces tejet delikat për shtetin. Sipas tij, fokusi i këtij angazhimi nuk është te fatet individuale të personave që ndodhen në paraburgim në Hagë, por te mbrojtja e një procesi historik që ndikon drejtpërdrejt në të kaluarën dhe të ardhmen e Republikës së Kosovës. “Në fund të fundit, nuk bëhet fjalë vetëm për individët atje, por për një proces tejet të rëndësishëm ku në lojë është e kaluara jonë e lavdishme, si dhe e ardhmja e vendit tonë dhe e brezave që do të vijnë”, përfundoi Rama.