Nevojë urgjente për kreun e shtetit, Nagavci bën thirrje për zgjedhjen e menjëhershme të Presidentit

Deputetja e Lëvizjes Vetëvendosje, Arbërie Nagavci, ka theksuar domosdoshmërinë që Kosova të pajiset sa më parë me Presidentin e ri të vendit, duke kërkuar veprime të shpejta në këtë drejtim. Gjatë një prononcimi publik, ajo ka vënë theksin te rëndësia e sigurimit të stabilitetit institucional dhe funksionimit të organeve shtetërore me mandat të plotë. “Sot Kosovës i duhet Presidenti. Vendi ynë ka nevojë për stabilitet institucional, përgjegjësi politike dhe institucione me mandat të plotë”, ka shkruar Nagavci. Sipas saj, ky proces është i ndërlidhur ngushtë edhe me sfidat aktuale që kërkojnë mbrojtjen e vërtetës historike rreth luftës së Ushtrisë Çlirimtare të Kosovës. “Në një kohë kur mbrojtja e së vërtetës për luftën e UÇK-së kërkon veprim të koordinuar juridik, politik dhe diplomatik, Republika ka nevojë për përfaqësim të fuqishëm dhe institucione funksionale”, ka shtuar ajo në postimin e saj. Duke kërkuar që ky hap të mos vonohet më tej, zyrtarja e Vetëvendosjes ka bërë thirrje për reflektim urgjent nga ana e klasës politike. “Për këtë, na duhet t’ia japim vendit Presidentin sot. Një President i zgjedhur do t’i sillte Kosovës stabilitet dhe siguri institucionale. Kjo vendimmarrje nuk mund të shtyhet më tej”, ka deklaruar ajo. Në fund, Nagavci ka kujtuar se barra e këtij vendimi historik bie drejtpërdrejt mbi institucionet e vendit dhe përfaqësuesit e popullit në Kuvend. “Kjo përgjegjësi është sot para nesh”, ka përfunduar ajo.