Aksion i Policisë: Nëntë shoferë përfundojnë në pranga për shkelje të rënda në trafik

Ministria e Punëve të Brendshme e Maqedonisë bën të ditur se gjatë 24 orëve të fundit, në kuadër të kontrolleve të ndryshme në terren, pjesëtarët e policisë kanë privuar nga liria nëntë drejtues mjetesh, ndërsa një tjetër është thirrur për bisedë zyrtare. Të gjithë ata dyshohen për veprën penale të “drejtimit të pakujdesshëm të automjetit”, në përputhje me nenin 297-a të Kodit Penal. Sipas autoriteteve policore, tetë nga personat e ndaluar kanë qenë duke drejtuar automjetet pa e kaluar më parë provimin e patentëvozitjes. Bëhet fjalë për shtetasit I.Xh. (34), O.E. (21) dhe N.T. (20), të gjithë nga Shkupi, E.D. (19) nga fshati Haraçinë i Shkupit, një 17-vjeçar nga fshati Studeniçan i Shkupit, S.D. (65) nga Serbia, një 16-vjeçar nga Velesi, si dhe Sh.A. (48) nga Prilepi, ky i fundit i kapur duke drejtuar mjetin nën ndikimin e alkoolit. Në mesin e të ndaluarve është edhe V.D. (31) nga fshati Razllovc i Dellçevës, i cili ka qenë duke drejtuar makinën pavarësisht se ndaj tij ishte vendosur masë aktive ndalimi për drejtim automjeti. Po ashtu, shtetasi holandez D.G.T. (24) është kapur duke lëvizur me shpejtësi tejet të lartë, duke arritur shpejtësinë prej 175 kilometrash në orë në një zonë ku kufiri i lejuar ishte 80 kilometra në orë. Nga MPB-ja njoftojnë se pas dokumentimit të plotë të secilit rast, ndaj shkelësve do të ngrihen kallëzimet përkatëse penale. Njëkohësisht, institucioni u bën thirrje publike të gjithë drejtuesve dhe pjesëmarrësve në komunikacion që t'i përmbahen rreptësisht rregullave të trafikut, të mos u jepni makinave pa patentë shoferi, pa respektuar masat e ndalimit apo nën ndikimin e alkoolit, me qëllim që bashkërisht të rritet siguria në rrugë.