Hapet rruga për zgjerimin e BE-së: Zbardhet strategjia e re e Komisionit Evropian për Shqipërinë dhe rajonin

Komisioni Evropian ka ndërmarrë një hap të rëndësishëm duke miratuar paketën mbi rishikimet e politikave para zgjerimit, e cila përfshin gjashtë shtetet e Ballkanit Perëndimor, ku bën pjesë edhe Shqipëria. Dokumenti i bërë publike këtë të martë përcakton linjat udhëzuese dhe veprimet konkrete për përgatitjen e bllokut evropian drejt një familjeje më të madhe, duke ofruar një analizë të thelluar se si traktatet aktuale dhe ato të ardhshme mund t'i shërbejnë këtij qëllimi. Njëkohësisht, korniza e re sjell një sërë garancish për marrëveshjet e ardhshme të anëtarësimit, përfshirë instrumente më rigoroze sektoriale dhe një klauzolë të re institucionale, me qëllim që reformat dhe angazhimet e ndërmarra gjatë bisedimeve të zbatohen në mënyrë të qëndrueshme edhe pas hyrjes zyrtare në union. Për më tepër, Brukseli parashikon një dinamikë më të afërt të integrimit për vendet aspirante, ende pa u bërë anëtare të plota, përvojë kjo që synon të sjellë dobi të prekshme si për qytetarët, ashtu edhe për sipërmarrjet. “Komisioni do të evidentojë instrumentet ekzistuese të integrimit gradual dhe do të identifikojë mundësitë për thellimin e integrimit në sektorë strategjikë, si energjia, transporti, teknologjia digjitale dhe mbrojtja”, theksohet në dokument. Sipas këtij vizioni, ky mekanizëm do të mbështesë negociatat e anëtarësimit, duke forcuar kapacitetet administrative dhe besimin e ndërsjellë, ndërkohë që përfshirja e vendeve kandidate do të mbetet e kushtëzuar dhe e ndryshueshme. “Komisioni do të nisë dialogë vjetorë me partnerët e zgjerimit për të ndjekur progresin, për të identifikuar mundësitë dhe për të adresuar boshllëqet në integrimin gradual”, shtohet më tej. Për të garantuar stabilitetin e bllokut, traktatet e ardhshme të anëtarësimit do të pasurohen me masa shtesë mbrojtëse, të cilat do të shtrihen edhe në periudhën e pas-anëtarësimit, posaçërisht në sektorë kyç si ekonomia, tregu i brendshëm, drejtësia dhe çështjet e brendshme. “Periudha gjatë së cilës masat mbrojtëse mund të aktivizohen në fusha të tilla si ekonomia, tregu i brendshëm, drejtësia dhe çështjet e brendshme do të zgjatet ndjeshëm pas anëtarësimit”, shpjegohet në paketë. Një risi tjetër është masa e posaçme mbrojtëse institucionale, e cila do të aktivizohej në rast të shkeljeve të rënda të vlerave themelore të Bashkimit Evropian dhe parimit të bashkëpunimit të sinqertë, duke rrezikuar deri edhe pezullimin e të drejtës së votës në Këshillin e BE-së. Së fundmi, plani i Brukselit përfshin edhe mundësinë e marrëveshjeve kalimtare në fusha të caktuara, si lëvizja e lirë e punonjësve dhe shërbimeve, bujqësia, produktet e ndjeshme, financimi dhe pjesëmarrja në skemat e përbashkëta.