Zgjedhja e Presidentit: Bekim Sejdiu përsërit qëndrimin, konfirmon tërheqjen përfundimtare nga gara

Pavarësisht thirrjeve dhe përmendjes së emrit të tij nga kryeministri Albin Kurti gjatë konferencës së sotme, ku iu kërkua një marrëveshje me PDK-së dhe Bedri Hamzën për postin e të parit të vendit, profesor Bekim Sejdiu ka konfirmuar prerazi se nuk bën më pjesë në këtë garë institucionale. Sejdiu ka bërë të ditur se për vendimin e tij të formnalizuar ka vënë në dijeni edhe një herë krerët e Lidhjes Demokratike të Kosovës (LDK), si dhe vetë kryeministrin Albin Kurti, duke u bërë të qartë se është tërhequr plotësisht nga procesi i zgjedhjes së presidentit. "Unë i kam njoftuar, kam qenë në komunikim me krerët e LDK-së edhe i kam njoftuar së fundi edhe krerët e LDK-së edhe kryeministrin Kurti që unë nuk jam pjesë e këtij procesi për zgjedhjen e presidentit të Kosovës. Unë kam hy me idenë kur kam hy në fillim të shtatorit, me motivin e vetëm që me dal prej një ngërçi, por nuk u realizua sepse nuk u bënë votat edhe rrjedhimisht unë kam bërë një herë tërheqje publike edhe tash normalisht emrin me ma përmend s’mundem me ia ndalu askujt. Edhe e di që e bëjnë me qëllimin më të mirë të mundshëm, e di që kanë besim në mua, por unë i kam informuar që unë jam i tërhequr nga kjo garë", ka deklaruar Sejdiu. Ai ka kujtuar se në këtë dinamikë politike kishte hyrë në kuadër të një kombinimi ku LDK-ja do të shërbente si subjekt propozues, ndërsa Lëvizja Vetëvendosje si mbështetëse, duke shtuar se kontaktet kryesore i kishte mbajtur pikërisht me drejtuesit e partisë që e kishte nominuar. "Unë ju kam thënë që jam i tërhequr, unë nuk jam i informuar. Unë kur kam hyrë me LDK-në si propozuese, VV-në si mbështetëse, me qat konspiracion kam hyrë dhe kryesisht i kam bërë komunikimet me drejtues të LDK-së që më kanë propozu e më kanë thirr mua me hy në këtë proces. E çmoj shumë edhe besimin e kryeministrit Kurti, por unë i kam njoftuar se jam tërhequr nga gara, ju kam treguar se nuk jam pjesë e garës", ka shtuar ai. Sejdiu u shpreh i gatshëm t'u dëshmojë drejtuesve të LDK-së edhe mesazhin zyrtar përmes të cilit i kishte njoftuar për qëndrimin e tij. Sipas tij, nuk është e hijshme që dikush të bëhet president vetëm si mjet për t'i ikur zgjedhjeve të parakohshme, duke theksuar se ky dikaster i takon vetëm atij që e meriton realisht. "Nëse dojnë këta të LDK-së, mundem me ua dërgu edhe mesazhin që ua kam dërguar dhe unë ju kam thënë kështu: më së pari nuk konsideroj që është e denjë me u zgjedh president dikush që zgjedhet vetëm me i shmang zgjedhjet, president duhet të zgjedhet dikush që e meriton atë pozitë. Dhe dmth as me ndërlidhjen me tema të tjera që janë të rëndësishme për këtë vend. E dyta, unë kam hyrë në një kombinim politik LDK-VV dhe e kisha mirëprit përkrahjen e të gjithëve. Partitë politike në përgjithësi kanë pasë fjalë të mira për mua si kandidat dhe e çmoj edhe faktin se edhe një pjesë e gazetarëve dhe opinionit publik kanë pasur vlerësim pozitiv për mua. Mirëpo, meqë unë nuk i kam pasur votat, unë jam tërheq nga kjo garë. Për më tepër, në këtë proces me kaq shumë drama, unë nuk kam qenë në Kosovë fare këto ditë. E çmoj shumë besimin dhe vlerësimin nga të gjithë, por unë nuk jam më pjesë e këtij procesi", ka përfunduar ai. Reagimi i Sejdiut vjen si pasojë e rikthimit të emrit të tij në tavolinën e bisedimeve për kreun e shtetit. Kjo ndodh ndërkohë që kreu i ekzekutivit, Albin Kurti, e përmendi sërish figurën e tij gjatë konferencës së sotme, në një kohë kur kanë mbetur vetëm edhe pak orë deri në skadimin e afatit kushtetues për zgjedhjen e presidentit të vendit.