Manchester City përballet me 'stuhi' padish: Klubet e Premierligës kërkojnë dëmshpërblim milionësh

Manchester City ndodhet përpara një sfide të paprecedentë ligjore, pasi një grup klubesh rivale në Premierligë janë duke u organizuar për të kërkuar kompensim financiar, pas vendimit historik mbi shkeljet e rënda të rregullave financiare nga gjiganti nga Mançestri. Elita e futbollit anglez është tronditur nga konstatimi i një paneli të pavarur, i cili ka gjetur Manchester Cityn fajtor për shkeljen e 114 nga 115 akuzat e ngritura ndaj tij. Ky zhvillim konsiderohet si një moment kthesë për futbollin, ndërsa klubet e prekura tashmë kanë nisur konsultimet me ekspertë ligjorë për të vlerësuar dëmet e shkaktuara gjatë periudhës 2009-2018. Sipas informacioneve të siguruara, një numër klubesh kanë mobilizuar avokatë të njohur për të ndërtuar një strategji të përbashkët. Disa prej tyre pretendojnë se shkeljet e Cityt u kanë mohuar atyre vende në Ligën e Kampionëve, duke u shkaktuar humbje të mëdha nga të drejtat televizive, shitja e biletave dhe bonuse të humbura nga sponsorët për shkak të moskualifikimit në kompeticionet evropiane. Si precedent për këtë betejë ligjore shërben rasti i Evertonit, i cili u detyrua t'i paguante 35.1 milionë funte Burnleyt, pasi shkeljet e rregullave financiare u vlerësuan si një avantazh i padrejtë sportiv. Megjithatë, klubet e interesuara duhet të presin përfundimin e plotë të procesit të apelimit, pasi Manchester City vazhdon të këmbëngulë në pafajësinë e tij. Në një reagim zyrtar, zëdhënësi i Manchester Cityt ka përsëritur qëndrimin e mbajtur që nga shkurti i vitit 2023, duke theksuar se procesi është ende në zhvillim e sipër dhe se klubi mbetet i angazhuar në respektimin e konfidencialitetit. Për dallim nga rastet e mëparshme në UEFA, ku provat u konsideruan të parashkruara nga Gjykata e Arbitrazhit Sportiv, rregulloret e Premierligës nuk ofrojnë të njëjtat kufizime ligjore, duke e bërë këtë betejë shumë më të rrezikshme për “Cityzens”. Diskutimet për një padi masive kolektive po intensifikohen, ndërkohë që firmat ligjore po këshillojnë klubet se tani është momenti më i favorshëm për të kërkuar dëmshpërblim për dëmet e akumuluara gjatë viteve kur klubi u shndërrua në një fuqi globale të futbollit.