Kërkohet seancë e jashtëzakonshme për Ligjin e Speciales, Hamza: Aleanca na ka mbështetur me nënshkrime

Kryetari i Partisë Demokratike të Kosovës (PDK), Bedri Hamza, ka deklaruar gjatë një konference për medie se subjekti që ai drejton po insiston në thirrjen urgjente të një seance të jashtëzakonshme parlamentare, me qëllim të miratimit në lexim të dytë të Ligjit për Gjykatën Speciale. Gjatë fjalës së tij, Hamza bëri të ditur se tashmë është siguruar një numër i mjaftueshëm firmash për këtë nismë, ndërsa ftoi edhe deputetët e tjerë që t'i bashkohen këtij procesi përmes mbështetjes me nënshkrime. “PDK po pret, po kërkon që të thirret seanca, që ta aprovohet Ligji për Specialen në leximin e dytë. Ne i kemi dërgu ftesë dhe kërkesë znj. Haxhiu që ta thërret seancën. I kemi mbledhur nënshkrimet e një numri të konsiderueshëm për seancë të jashtëzakonshme, të PDK-së dhe Aleancës. I kemi dërguar ftesë dhe lutje deputetëve të VV’së e LDK’së dhe të komuniteteve joshumicë joserbe që ta në i japin nënshkrimet për seancë të jashtëzakonshme. Ne kërkojmë që Ligji të aprovohet. S’ka asnjë arsye që të mos aprovohet në lexim të dytë. S’ka pengesa ligjore e procedurale. S’do të ketë as pengesa politike nga subjektet tjera politike. Ka kaluar në lexim të parë dhe presim që të kalojë edhe në lexim të dytë. S’është ligj për PDK’në, është ligj që e kalon peshën e rëndësinë e një partie politike. Është ligj për luftën për pavarësi të popullit të Kosovës. Është kërkesë e drejtë”, ka theksuar ai. Kreu i PDK-së shtoi gjithashtu se para ndërmarrjes së këtyre hapave institucionalë, ka zhvilluar takime me krerët e partive tjera për të kërkuar konsensus dhe mbështetje. “Para se ta procedoj këtë ligj. I kam takuar të gjithë liderët, Kurtin, Abdixhikun e Gjinin. U kam kërkuar përkrahjen. Ne spo duam ta pengojmë drejtësinë. Ne duam drejtësi. Ne s’po duam ta shpërbëjmë këtë gjykatë”, përfundoi Hamza.