Hamza kërkon seancë urgjente për Gjykatën Speciale: Çështja e presidentit është çështje koincidence

Kryetari i Partisë Demokratike të Kosovës, Bedri Hamza, gjatë një konference për media, i ka drejtuar sërish një thirrje publike kryetares së Kuvendit, Albulena Haxhiu, për caktimin e seancës ku do të votohet në lexim të dytë ndryshimi i Ligjit për Gjykatën Speciale. “Jemi në pritje që të thirret seanca. I kemi drejtuar ftesë zyrtare Haxhiut që ta thërrasë seancën. Kërkojmë që ky ligj të aprovohet në lexim të dytë. U bëj thirrje të gjithë deputetëve që të paraqiten në Kuvend për t’i dhënë votën ligjit. Po ashtu, i bëj thirrje Qeverisë që të përmbahet dhe të mos ndikojë në tensionimin e mëtejshëm të situatës”, u shpreh Hamza. Duke u ndalur te zhvillimet politike, ai ka theksuar se ngjarja lidhur me postin e presidentit përbën një rastësi kohore me afatin e fundit të përcaktuar. Sipas tij, ndonëse do të ishte e preferueshme arritja e një marrëveshjeje për të shmangur zgjedhjet e reja, kjo mbetet çështje më vete. “Kjo është temë e ndarë. Nuk kemi pse të takohemi me askënd para se ligji të kalojë në lexim të dytë”, shtoi ai. Në lidhje me procedurat parlamentare, Hamza ka bërë të ditur se deri më tani nënshkrimet janë dorëzuar nga 22 deputetë të PDK-së dhe 7 të AAK-së, ndërkohë që për thirrjen e një seance të jashtëzakonshme kërkohet numri prej 40 firmash.