Hamza ngul këmbë: Asnjë takim për Presidentin pa u miratuar Ligji për Specialen

Kryetari i Partisë Demokratike të Kosovës, Bedri Hamza, ka rikonfirmuar qëndrimin e tij se nuk do të ulet në tavolinën e bisedimeve për çështjen e presidentit derisa të kalojë në lexim të dytë Ligji për Gjykatën Speciale. Gjatë një deklarate për media, duke folur rreth takimit të fundit me kryeministrin Albin Kurti, Hamza sqaroi se çështja e zgjedhjes së presidentit thjesht ka përkuar në kohë me diskutimet rreth këtij projektligji, ndërsa theksoi se fokusi kryesor i bisedës ka qenë fati i ish-krerëve të Ushtrisë Çlirimtare të Kosovës që po mbahen në Hagë. “Qëndrimi ynë vazhdimisht ka qenë dhe mbetet konsistent. Këto tema nuk i kemi shndërruar në ndonjë pazar politik; rasti i presidentit është thjesht një koinçidencë. Kosova ka mundur ta ketë presidentin dhe ne përsëri do të dilnim me kërkesën për këtë ligj. Ne kërkojmë miratimin e tij në të dy leximet. Natyrisht, është e dëshirueshme të arrihet një konsensus mes forcave politike që vendi të bëhet me president dhe të shmangen zgjedhjet e reja. Kemi diskutuar për mbështetjen shtetërore në këtë proces, financimin adekuat, por edhe për temën e presidentit që është aktuale”, u shpreh ai. Kreu i PDK-së paralajmëroi gjithashtu se nëse ky projektligj nuk merr dritën jeshile deri në mesnatë, partia e tij do të ndërmarrë të gjitha hapat e mundshëm ligjorë që i lejon legjislacioni në fuqi. “Përgjigjja jonë është e prerë: nuk kemi arsye të takohemi me askënd para se ky ligj të kalojë përfundimisht në leximin e dytë”, përfundoi Hamza.