Sulmi ndaj gazetarit Bledi Mane, zbardhen detajet e incidentit pranë Kuvendit

Gazetari Bledi Mane ka qenë cak i një sulmi fizik dhe verbal gjatë ditës së djeshme, ku u rrethua dhe u qëllua me vezë nga një grup protestuesish të organizuar në kuadër të të ashtuquajturit “Revolucion Flamingo”, në afërsi të Kuvendit të Shqipërisë. Gjatë këtij incidenti, disa prej protestuesve janë dëgjuar duke e fyer me thirrjet “servili i Ramës”, ndërkohë që vetë gazetari u është drejtuar duke u kërkuar llogari se çfarë kishin personale me të. Nëpërmjet një reagimi të bërë publik në llogarinë e tij në Instagram një ditë pas ngjarjes, Mane ka rrëfyer dinamikën e plotë të ngjarjes. Sipas tij, ngjarja ka ndodhur rreth orës 16:00 të datës 5 tetor, ndërsa po lëvizte në këmbë në rrugën “Abdi Toptani”. Ai ka bërë të ditur se, përveç sulmit me vezë, është goditur edhe me një gur të vogël në pjesën e prapme të kokës, ndërsa është ndjekur nga një turmë prej afërsisht 30 personash. “U detyrova të ndaloj e t’i pyes ‘çfarë kishin me mua personalisht’, por turma e agravuar filloi në kor të shante, të fyente e të kërcënonte në mënyrë të organizuar dhe histerike,” ka shkruar ndër të tjera gazetari, duke shtuar se mes protestuesve kishte edhe persona të mitur, të cilët i kërkonin llogari për mënyrën se si ai ushtron profesionin dhe për qëndrimet e tij publike në media dhe rrjete sociale. Mane e ka cilësuar këtë ngjarje si një sulm të drejtpërdrejtë ndaj punës dhe bindjeve të tij, duke ngritur pretendime se grupi që e ka sulmuar ka qenë i paguar. Në deklaratën e tij, ai ka përmendur emrat e Arlind Qorit dhe Agron Shehajt, duke u drejtuar akuza se qëndrojnë pas financimit të akteve të tilla, pavarësisht se nuk ka paraqitur prova konkrete për këtë pretendim. Pavarësisht incidentit, gazetari ka theksuar se asnjë turmë apo individ i paguar nuk mund t'i ndalojë gazetarët në përmbushjen e misionit të tyre, duke u bërë thirrje kolegëve që të vazhdojnë punën pa u trembur nga kërcënimet. Në fund të reagimit të tij, ai ka shprehur falënderime për organizatat e gazetarëve, mediat, kolegët, miqtë, Policinë e Shtetit dhe trupin diplomatik të akredituar në vend për solidaritetin e treguar.