Debatet për GJKKO-në, ministri Gogu: Konventa evropiane do të përcaktojë standardet e reja për avokatët

Rregullorja e diskutueshme e GJKKO-së, e cila vendos kufizime të reja për gazetarët dhe avokatët brenda mjediseve të gjykatës, pritet të kalojë në filtër përmes parimeve që sjell ratifikimi i Konventës së Këshillit të Evropës për Mbrojtjen e Profesionit të Avokatit. Gjatë seancës dëgjimore të kësaj të marte në Komisionin e Ligjeve, ministri i Drejtësisë, Toni Gogu, theksoi se pas miratimit të këtij dokumenti ndërkombëtar, parimet e tij do të duhet të pasqyrohen detyrimisht në të gjitha aktet ligjore dhe nënligjore. Ai nënvizoi se kjo detyrë nuk i përket vetëm Ministrisë së Drejtësisë, por shtrihet edhe mbi institucionet e pavarura të sistemit të drejtësisë. “Me miratimin e Konventës ne duhet që të gjitha standardet e Konventës t’i mishërojmë në akte ligjore dhe nënligjore që miratohen, qoftë për Ministrinë e Drejtësisë, qoftë për organet e pavarura të drejtësisë”, u shpreh ministri Gogu gjatë fjalës së tij. Diskutimet u hapën nga deputeti Arjan Ndoja, i cili drejtoi një pyetje të drejtpërdrejtë drejt ministrit lidhur me përputhshmërinë e rregullores së GJKKO-së me Konventën e re, duke kërkuar të dihej nëse dikasteri i drejtësisë kishte kryer ndonjë analizë mbi këtë çështje. Në pyetjen e tij, Arjan Ndoja u shpreh: “Jam pro miratimit të kësaj konvente. Kam disa probleme praktike. Ka dalë një rregullorë nga GJKKO për sjelljen e avokatëve kur futen në GJKKO. A jeni në dijeni ju si ministër dhe nëse stafi juaj ka bërë ndonjë analizë mes kësaj konvente, a bie në kundërshtim kjo rregullore me këtë konventë?” Duke iu përgjigjur kësaj shqetësimi, ministri Toni Gogu sqaroi se përgjegjësia për të harmonizuar aktet e brendshme i takon çdo institucioni shqiptar pas ratifikimit të Konventës. Sipas tij, roli i Ministrisë së Drejtësisë mbetet garantimi i respektimit të standardeve evropiane dhe i aksesit të pandërprerë të palëve në gjykata, ndërkohë që mbikëqyrja e këtij procesi mbetet në kompetencë të vetë gjykatës dhe Këshillit të Lartë Gjyqësor (KLGJ). “Për konfliktin që mund të ketë mes rregullores së brendshme të GJKKO-së me konventën, mendoj që do të jetë detyrimi i çdo institucioni shqiptar, nëse ju çmoni që ta ratifikoni Konventën, që të marrë e të shikojë të gjitha aktet e veta”, u shpreh Gogu, duke shtuar se ministria ka detyrimin të njoftojë institucionet për detyrimet e reja. Nga ana e tij, deputeti Arjan Ndoja ngriti sërish si shqetësim bllokimin e proceseve gjyqësore dhe bojkotin e shpallur nga Dhoma e Avokatisë, situatë kjo që sipas tij po cenon afatet e paraburgimit dhe të drejtat e personave nën hetim. Në kundërpërgjigje, ministri Toni Gogu ndau të njëjtin shqetësim me deputetin, duke shprehur gatishmërinë e tij për të ndërmjetësuar dhe për t'u ulur në bisedime me palët nëse kjo kërkohet, por pa shkelur kompetencat kushtetuese dhe ligjore. “Ne kemi sjellë para jush një instrument ndërkombëtar që siguron aksesin që duhet të kenë avokatët në ushtrimin e profesionit të tyre dhe ky është një standart që e kanë marrë përsipër të gjitha ato palë që kanë nënshkruar Konventën. Tani ky standard duhet të bëhet pjesë e sistemit tonë të drejtësisë”, përfundoi ai.