Protesta “Jo në emrin tim”: Qytetarët sfidojnë shiun për të kërkuar mbështetje institucionale për ish-pjesëtarët e UÇK-së

Për të dhjetën ditë radhazi, qytetarët e Kosovës janë grumbulluar para institucioneve shtetërore në Prishtinë, duke kërkuar reagim institucional lidhur me aktgjykimet e Gjykatës Speciale në Hagë ndaj ish-luftëtarëve të Ushtrisë Çlirimtare të Kosovës. Pavarësisht motit të ligësht dhe reshjeve të shiut, protestuesit nuk janë tërhequr nga kërkesa e tyre për mbështetjen e çlirimtarëve. Organizatori i kësaj proteste, Çlirim Haziri, ka bërë thirrje direkte drejt ligjvënësve, duke theksuar se projektligji për Gjykatën Speciale tashmë ndodhet në Kuvend. Sipas tij, është koha që secili deputet të marrë përgjegjësi dhe të votojë bazuar në bindjet e tyre, duke paralajmëruar se heshtja institucionale përballë kësaj çështjeje është e papranueshme. “Nuk mund ta mbani këtë situatë pezull ndërkohë që njerëzit po lodhen. UÇK-ja nuk është temë e politikës ditore, por është vetë themelet e shtetit tonë. Historia jonë meriton mbështetje reale dhe jo shpërfillje”, deklaroi Haziri, duke shtuar se protestuesit janë të gatshëm të vazhdojnë qëndresën e tyre në shesh. Në foltoren e protestës u shfaq edhe studentja Anisa Rukiqi, e cila solli një rrëfim emocional lidhur me pasojat e luftës. Duke ndarë përvojën e saj familjare, ku gjyshi i saj u vra në oborrin e shtëpisë gjatë konfliktit, ajo e cilësoi vendimin e Gjykatës Speciale si një paradoks të rëndë përballë atyre që luftuan për lirinë e vendit. “Drejtësia është shtylla e dinjitetit të një populli, mirëpo sot po përballemi me dënimin e atyre që na mbrojtën nga shfarosja. Unë e njoh luftën jo vetëm nga librat, por nga dhimbja e gjallë e familjes sime”, u shpreh Rukiqi para të pranishmëve. Ndërkaq, këngëtarja Violetë Kukaj, e cila iu bashkua thirrjeve të protestuesve, bëri thirrje për unitet të vazhdueshëm. Ajo theksoi se kauza për mbrojtjen e luftës së shenjtë të UÇK-së kërkon angazhim të përbashkët dhe këmbëngulje përtej ditës së sotme.