Kriza klimatike: Liqeni i Konstancës drejt tharjes historike, autoritetet japin alarmin

Liqeni më i madh në Gjermani po vazhdon të vuajë pasojat e mungesës së reshjeve edhe gjatë stinës së vjeshtës, duke regjistruar nivele shqetësuese dhe rekorde të reja negative të ujit. Liqeni i Konstancës, i cili shtrihet gjithashtu në territoret e Austrisë dhe Zvicrës, po ballafaqohet aktualisht me kuota historikisht të ulëta, ndërkohë që nuk shihen ende shenja rikuperimi. Për shkak të kësaj situate kritike, disa prej linjave të transportit detar janë detyruar të ndërpresin qarkullimin, sipas informacioneve të publikuara së fundmi. Ekspertët e Agjencisë Shtetërore të Baden-Vyrtembergut për Mjedisin theksojnë se, krahas luhatjeve natyrore sezonale, thatësira e vazhdueshme do të vazhdojë të ndikojë në uljen e mëtejshme të niveleve. Të dielën, në orën 12:32, niveli i ujit në qytetin e Konstancës shënoi 250 centimetra, duke qenë plot 106 centimetra nën mesataren afatgjatë prej 356 cm për datën 4 tetor. Rënia ka vijuar edhe të hënën, ku në orën 16:00 matësi ka treguar vetëm 248 centimetra. Furnizimi me ujë i Liqenit të Konstancës varet ngushtësisht nga lumi Rajna, i cili po përjeton gjithashtu një fazë të paprecedentë thatësire. Pavarësisht se kjo rrjedhë ndërkombëtare ka rreth 200 degë, Rajna mbetet arterie kryesore, duke siguruar afërsisht 62 për qind të vëllimit total të ujit. Në një prononcim për mediat, Teresa Gaertner, zëdhënëse e shërbimeve komunale të Konstancës, u shpreh se gjendja aktuale e ujërave është jashtëzakonisht e ulët. Ajo theksoi se asnjëherë më parë gjatë stinës së verës niveli nuk kishte rënë kaq shumë, çka ka sjellë vonesa dhe kufizime të dukshme në lundrim. Duke shtjelluar më tej ndikimin në terren, Gaertner pranoi se anijet e linjave të ndryshme janë detyruar të shmangin pika të caktuara ankorimi, ndërsa shërbimet e transportit detar në disa zona janë pezulluar deri në një njoftim të dytë. Faktorët kryesorë që çuan në këtë katastrofë natyrore lidhen me temperaturat ekstreme që arritën deri në 40 gradë Celsius gjatë verës, duke shkaktuar avullim masiv. Njëkohësisht, reshjet e pakta të borës, veçanërisht në zonat më të ulëta të Alpeve, kanë dhënë ndikimin e tyre negativ. Klimatologu Karsten Brandt ka paralajmëruar se, në skenarin më optimist, Liqeni i Konstancës mund të kthehet në nivele normale deri në muajin mars të vitit 2027. Megjithatë, për të arritur këtë, ai thekson nevojën e domosdoshme për reshje të dendura vjeshtore dhe një dimër të butë e të pasur me reshje. Eksperti ka shtuar se ekziston frika e hyrjes në një rreth vicioz, ku mungesa e shiut do t'i çojë sërish drejt stinës së ngrohtë pa një zgjidhje afatgjatë. Megjithatë, duke filluar nga dita e enjte, parashikimet metorologjike paralajmërojnë një rënie të temperaturave dhe mundësi për reshje, pavarësisht se nuk pritet ndonjë sasi e konsiderueshme shiu.