Kushti i prerë i Bedri Hamzës: S’ka tryezë diskutimi me Kurtin pa u miratuar Ligji për Specialen

Kryetari i Partisë Demokratike të Kosovës, Bedri Hamza, ka përjashtuar çdo mundësi takimi me kryeministrin Albin Kurti, për sa kohë që deputetët e formacionit të tij politik nuk japin dritën jeshile për miratimin në lexim të dytë të ndryshimeve në Ligjin për Gjykatën Speciale. Duke folur para përfaqësuesve të mediave, kreu i PDK-së ishte i prerë në qëndrimin e tij. "S’ka takim. Nuk do të ketë derisa ligji të aprovohet në lexim të dytë. Për Kosovën, ligji është domosdoshmëri. Nuk janë çështje të lidhura. Le të votohet ligji dhe pastaj jemi të hapur të diskutojmë për tema të tjera", u deklarua Hamza. Sipas tij, është qëndrim unanim i strukturave të PDK-së që të thirret urgjentisht një seancë plenare e Kuvendit, ku ky projektligj të kalojë në fazën e votimit. Ai shtoi se aktualisht nuk ekziston asnjë lloj pengese, qoftë ajo procedurale, juridike apo politike, që mund ta arsyetojë zvarritjen e këtij procesi.