Përleshjet në kryeqytet, Rama: Pamjet e qytetarëve të lënduar në QKUK janë tronditëse

Kryetari i Prishtinës, Përparim Rama, ka cilësuar si tepër të dhimbshme skenat e mbrëmshme që vijnë nga sheshi i kryeqytetit, ku u regjistrua një përplasje e tensionuar mes forcave policore dhe qytetarëve protestues. Sipas kreut të komunës, roli kryesor i institucioneve shtetërore është garantimi i sigurisë dhe mbrojtja e qytetarëve, e jo që një incident i izoluar të shërbejë si alibi për të delegjitimuar një protestë publike. Në reagimin e tij, Rama ka hedhur akuza të drejtpërdrejta ndaj kryeministrit Albin Kurti, duke kujtuar se dikur ai kritikonte ashpër zyrtarët e dikurshëm për vetura zyrtare dhe frikë nga populli, ndërsa mbrëmë ndodhi e kundërta, me largimin e pushtetarëve përmes mjeteve të blinduara. “Pakënaqësia qytetare kërkon përgjigje politike. Gazi lotsjellës nuk e zëvendëson atë. Albin Kurti dikur mbajke ligjërata për xhipat e zinj dhe bërtiste: “Pse po frikësoheni nga populli?”. Mbrëmë, ai dhe të gjithë deputetët e tij ikën nga ky popull me qata xhipa të zi! Albin Kurti dikur thoshte se sheshet janë të qytetarëve. Të qytetarëve janë edhe sot!”, ka theksuar ndër të tjera Rama në shkrimin e tij.