Prapaskenat e operacionit policor: Komandanti që drejtoi aksionin mbrëmë kishte arrestuar Albin Kurtin në vitin 2005

Një protestë e qetë, e cila kishte nisur tri javë më parë, është përshkallëzuar mbrëmë në incidente dhe përleshje të dhunshme, duke lënë pas edhe persona të lënduar. Tubimi u organizuar si shenjë kundërshtimi ndaj vendimit të Gjykatës Speciale të 16 shtatorit, e cila dënoi me 81 vjet burgim ish-krerët e UÇK-së në Hagë. Gjatë protestës u kërkua miratimi dhe votimi i shpejtë në Kuvend i Ligjit për Dhomat e Specializuara. Tensioni kulmoi pasditen e së hënës, më 5 tetor, kur protestuesit bllokuan për disa orë daljen e deputetëve të legjislaturës së 11-të nga ndërtesa e Kuvendit të Kosovës, duke kërkuar kalimin urgjent të ligjit në lexim të dytë. Ndonëse ky projektligj kishte kaluar në lexim të parë pavarësisht kundërshtimeve të Lidhjes Demokratike të Kosovës, situata ndryshoi pasi kryeministri Albin Kurti u takua me kryetarin e PDK-së, Bedri Hamza. Në këtë takim u kërkua që opozita të siguronte kuorumin për zgjedhjen e presidentit të ri para se të procedohej më tej me Specialen. Përplasjet fizike jashtë institucioneve nisën pasi disa deputetë të Lëvizjes Vetëvendosje arritën të largoheshin nga objekti. Hedhja e mjeteve piroteknike drejt Kuvendit dhe Qeverisë u shoqërua me ndërhyrjen e ashpër të forcave të rendit, të cilët përdorën sprej lotsjellës, gaz, topa uji dhe në disa raste edhe dhunë fizike ndaj turmës. Pamjet e transmetuara shfaqën skena të rënda ku ndërhyrja policore preku qytetarë të moshave të ndryshme, të rinj, pleq, por edhe veteranë të luftës. Në qendër të vëmendjes gjatë operacionit të mbrëmshëm u vu komandanti i stacionit policor që po udhëhiqte aksionin pranë ndërtesës qeveritare. Bëhet fjalë për ish-kapitenin e Njësisë Speciale Operative, Fatmir Balaj, i cili në vitin 2024 u emërua në krye të Stacionit Policor Qendra. Gjatë gjithë kohës, ai koordinohej me eprorët dhe vartësit e tij për të garantuar sigurinë e qytetarëve dhe objekteve shtetërore. Balaj u pa në komunikim të afërt me deputetin e PDK-së, Rrahman Rama, me të cilin u dakordua që të tërhiqej kordoni policor nga sheshi për t'i mundësuar qytetarëve një protestë të qetë. Megjithatë, ai tregoi qëndrim të prerë ndaj elementeve të caktuara, duke bërë të qartë se personat e maskuar nuk do të lejohen në tubim. Ndërkohë, ndonëse nga disa protestues u etiketua si “polic i qeverisë së Kurtit”, ironia e fatit e do që pikërisht Fatmir Balaj është oficeri që dikur kishte vënë në pranga vetë Albin Kurtin. Konkretisht, Balaj ishte ndër efektivët që arrestuan Kurtin më 19 tetor 2005, gjatë një proteste të organizuar nga Lëvizja Vetëvendosje në qendër të Prishtinës kundër pranisë dhe politikave të UNMIK-ut, me parullën kryesore “Jo negociata, Vetëvendosje”. Edhe në atë periudhë, Balaj kishte qenë në detyrë për ruajtjen e rendit dhe qetësisë publike, ku përveç Kurtit, policia kishte ndalur edhe mbi 30 aktivistë të tjerë. Kariera e gjatë e Balajt në Policinë e Kosovës shoqërohet me angazhime dhe kontribute të rëndësishme në shërbim të vendit. Përkushtimi i tij ndër vite u vlerësua edhe nga institucionet më të larta të shtetit, ku presidentja e vendit, Vjosa Osmani, e dekoroi atë me Medalje Presidenciale në Ditën e Pavarësisë, më 17 shkurt 2023, për shërbimin e çmuar në ruajtjen e rendit dhe sigurisë.