Përparim Rama: Pamjet e dhunës në shesh dhe në QKUK janë të papranueshme, Kurti iku me xhipa të zinj nga populli

Kryetari i Prishtinës, Përparim Rama, ka reaguar ashpër ndaj ngjarjeve të mbrëmshme në sheshin e kryeqytetit, ku pati përplasje mes policisë dhe protestuesve, duke i cilësuar pamjet e dhunës dhe trajtimit të qytetarëve në Qendrën Klinike Universitare të Kosovës si tejet të dhimbshme dhe shqetësuese. Rama theksoi se misioni primar i institucioneve shtetërore është garantimi i sigurisë dhe mbrojtja e qytetarëve, duke shtuar se një incident i izoluar nuk duhet të përdoret kurrë si pretekst për të njollosur apo delegjitimuar një protestë legjitime. Sipas kreut të Prishtinës, protestuesit e pranishëm ishin veteranë të luftës, familjarë të tyre dhe qytetarë të zakonshëm që kërkonin të drejtat e tyre, duke mbajtur me krenari emblemat e Ushtrisë Çlirimtare të Kosovës. Ai u shpreh se pas çdo pamjeje dhune fshihet një qytetar dhe një familje e cila doli në shesh për drejtësi, por përfundoi e lënduar dhe e fyer nga aparati shtetëror. Në reagimin e tij, Rama e ka drejtuar gishtin e akuzës nga kryeministri Albin Kurti, duke evokuar retorikën e tij të dikurshme kundër zyrtarëve që përdornin automjete zyrtare të blinduara. Ai e ironizoi kreun e ekzekutivit duke thënë se dikur ai kritikonte të tjerët se po fshiheshin nga qytetarët, ndërsa mbrëmë ai dhe kabineti i tij u larguan nga vendi i ngjarjes pikërisht me xhipa të zinj. “Pakënaqësia qytetare kërkon përgjigje politike. Gazi lotsjellës nuk e zëvendëson atë. Albin Kurti dikur mbajke ligjërata për xhipat e zinj dhe bërtiste: ‘Pse po frikësoheni nga populli?’. Mbrëmë, ai dhe të gjithë deputetët e tij ikën nga ky popull me qata xhipa të zi!”, ka shkruar ndër të tjera Rama. Në përmbyllje të reagimit të tij, i pari i kryeqytetit ka bërë thirrje që policia të mos përdoret si mjet për të mbuluar dështimet e ekzekutivit, duke kujtuar se mandatet qeverisëse ekzistojnë për t'i shërbyer qytetarëve dhe jo për të ushtruar forcë ndaj tyre.