Apeli shqyrton rastin e spiunazhit: Prokuroria synon ashpërsimin e dënimit për Jelena Gjukanoviqin

Në Gjykatën e Apelit është mbajtur seanca dëgjimore lidhur me rastin e Jelena Gjukanoviqit, e cila më parë ishte shpallur fajtore nga Gjykata Themelore në Prishtinë për veprën penale të spiunazhit në shërbim të inteligjencës serbe (BIA), duke u dënuar me gjashtë vjet burgim. Ky proces gjyqësor ka kaluar në shkallën e dytë pasi si Prokuroria Speciale, ashtu edhe pala mbrojtëse, kanë ushtruar ankesa ndaj vendimit fillestar. Përderisa mbrojtja pretendon pafajësinë ose zbutjen e dënimit, Prokuroria ka mbajtur qëndrim të kundërt. Në fjalën e saj përfundimtare gjatë procesit, Prokuroria Speciale ka kërkuar zyrtarisht një dënim më të lartë për të akuzuarën, duke vlerësuar se vendimi i shkallës së parë nuk reflekton peshën reale të veprimeve të kryera në dëm të sigurisë kombëtare.