“Mora tetë qepje në kokë” – Invalidi i UÇK-së akuzon Policinë e Kosovës për dhunë gjatë protestës

Ali Mejzinolli, veteran dhe invalid i luftës së Ushtrisë Çlirimtare të Kosovës, ka ngritur akuza të rënda ndaj Policisë së Kosovës, duke pretenduar se është sulmuar fizikisht gjatë protestës së mbrëmshme. Si pasojë e lëndimeve, ai ka kërkuar ndihmë mjekësore në repartin e Emergjencës, ku i janë bërë tetë qepje në kokë. Sipas dëshmisë së tij, tubimi kishte nisur në mënyrë paqësore dhe ai nuk kishte drejtuar fjalë fyese apo provokuese ndaj efektivëve të rendit apo të pranishmëve të tjerë. Mejzinolli ka sqaruar se situata ka eskaluar në momentin kur është hedhur gaz lotsjellës, i pasuar nga përdorimi i forcës fizike ndaj turmës së qytetarëve, ku thekson se pati edhe veteranë të tjerë të UÇK-së, invalidë lufte dhe familjarë të dëshmorëve të lënduar. “Pa prit dhe pa ditë, veç kurë e kam pa vetën në Emergjencë”, ka shkruar ai, duke evokuar momentet e tronditjes pas incidentit që e dërgoi në spital. Ai mban edhe pozitën e anëtarit të Kryesisë së Organizatës së Veteranëve të Luftës së UÇK-së në nivel qendror. Duke bërë një krahasim me të kaluarën, Mejzinolli ka kujtuar se gjatë periudhës së ish-Jugosllavisë ka qenë cak i dhunës nga milicia e atëhershme, por sipas tij, goditja e marrë nga forcat vendase ka lënë plagë më të rënda emocionale, duke pasur parasysh idealet për të cilat është luftuar. “Jam i mësuar me këtë lloj dhune. Ishte koha e ish-Jugosllavisë kur kisha pësu disa herë, njëjtë nga Milicia e atëhershme, por kjo nga Policia jonë më ka dhimtë ma shumë, se për këta luftuam që ta kemi Policinë dhe Ushtrinë tonë”, ka deklaruar ai. Në përfundim, Mejzinolli ka shtuar se kurrë nuk i kishte shkuar në mendje se pas lirisë do të përballej me një skenar ku Policia e Kosovës do të ushtronte dhunë mbi veteranët e luftës.