Humbja ndaj Finlandës në Ligën e Kombeve, ish-ikona e futbollit vlonjat lëshon kritika për zgjedhjet e stafin teknik

Ish-sulmuesi i shquar i futbollit vlonjat, Vasil Ruci, ka analizuar në detaje dështimin e Kombëtarjes shqiptare në përballjen kundër Finlandës, e cila u mbyll me rezultatin 2-1 në kuadër të xhiros së tretë të Ligës së Kombeve. Duke shqyrtuar ecurinë e sfidës, ai ka ndarë opinionet e tij mbi vendimet taktike të marra gjatë ndeshjes, duke u ndalur te menaxhimi i situatës pas daljes me karton të kuq të portierit Etrit Berisha. Sipas Rucit, stafi teknik duhet të kishte ndërhyrë me dy zëvendësime të njëkohësishme dhe jo vetëm me një, për të përshtatur skemën e lojës me dhjetë lojtarë. Ai ka theksuar se mesfushori Kristjan Asllani dhe sulmuesi Ernest Muçi duhet të ishin larguar nga fusha, ndërsa Arbër Hoxha duhej të mbahej në lojë për të ruajtur ekuilibrat sulmues. “Në momentin që ekipi ngelet me 10 lojtarë, nuk duhet të bënte një ndërrim por dy ndërrime. Duhet të ndërronte të gjithë sistemin e lojës. Logjika ime më thotë që në momentin që të dalë Hoxha nga fusha, për mua duhet të luante me 3 kontrollorë. Jo vetëm që ishim 1 me 0, por mbetëm me 10 lojtarë. Njeriu që mund të dilte kollaj në atë moment ishte Asllani. Pastaj a do të zgjidhte Hoxhën apo Muçin, kjo është në varësi të syrit apo taktikës që ka trajneri. Unë e mendoj kështu, do nxirrja Muçin. Do luaja me tre kontrollorë që të paktën me Hoxhën dhe Manajn në sulm, të arrija dhe të sulmoja”, është shprehur Ruci. Në vijim të analizës së tij, ish-futbollisti i njohur ka rezervuar fjalë lëvdate edhe për sulmuesin Mirlind Daku, duke e cilësuar lënien e tij jashtë formacionit si një zgjedhje të gabuar që ka dëmtuar potencialin e skuadrës kuqezi. “Daku është fatkeqësi që është lënë kaq kohë përjashtë. Është lojtar i cili jo vetëm dyluftues i mirë, por edhe vertikalizues i mirë. Atë që nuk ka Manaj”, përfundoi Ruci.