Krisja e madhe te Portugalia: Ronaldo rrezikon të mos luajë më kurrë nën drejtimin e Jorge Jesus

E ardhmja e Cristiano Ronaldos me fanellën e Kombëtares së Portugalisë është përfshirë nga dyshime të forta, pas ftohjes së marrëdhënieve dhe përplasjes së bujshme me përzgjedhësin Jorge Jesus. Sipas informacioneve të bëra publike nga gazetari portugez Rui Santos, kapiteni legjendar rrezikon seriozisht të mos i bashkohet më përfaqësueses, për sa kohë që stolin e saj e drejton trajneri aktual. Kujtojmë se sulmuesi u largua nga kampi stërvitor i Portugalisë gjatë afatit të fundit të ndeshjeve ndërkombëtare, pasi mes tij dhe trajnerit patë tensione të hapura. Fërkimi lindi si pasojë e vendimit teknik për ta lënë Ronaldon në bankën rezervë në sfidën kundër Norvegjisë. Pas ndeshjes, Jesus doli në një prononcim publik ku mbrojti zgjedhjen e tij, duke theksuar se të gjithë lojtarët gëzojnë trajtim të barabartë dhe se privilegjet nuk ekzistojnë brenda grupit. Megjithëse në ditët në vijim pati tentativë për të ulur tensionet dhe vetë trajneri u shpreh se ngjarja i përket të kaluarës, duke lënë të hapur mundësinë e rikthimit në grumbullimin e ardhshëm, situata në prapaskenë duket krejt ndryshe. Sipas dëshmisë së Rui Santos, ylli portugez ka mbetur i pakënaqur dhe i fyer nga disa deklarata të dhëna së fundmi nga Jesus gjatë konferencave për shtyp, gjë që ka çuar në një dëmtim të pariparueshëm të raporteve mes tyre. Nëse këto zhvillime konfirmohen, atëherë skenari i një ndarjeje përfundimtare mes Ronaldos dhe Kombëtares portugeze gjatë periudhës së drejtimit të Jorge Jesus mbetet një mundësi shumë reale.