Gabimi fatal i arbitrit detyron përsëritjen e ndeshjes në FA Cup

Përderisa vëmendja e futbollit botëror është përqendruar te Ligat e Kombeve, në Angli është regjistruar një vendim i rrallë dhe i bujshëm për sa i përket FA Cup, kompeticionit më të vjetër futbollistik në planet. Një sfidë e zhvilluar mes ekipeve të niveleve më të ulëta do të duhet të luhet nga e para për shkak të një shkeljeje procedurale të arbitrit. Bëhet fjalë për përballjen mes Woodford Town, pjesë e Essex Senior League, dhe Mulbarton Wanderers, që militon në Division One North të Isthmian League. Ndeshja, e cila u zhvillua më 19 shtator, përfundoi me fitoren 2-1 të ekipit mysafir, por rezultati nuk do të mbetet në fuqi. Shkak për këtë vendim u bë një incident në minutën e 30-të të takimit. Woodford Town kishte shënuar nga pika e bardhë e penalltisë, por gjyqtari e anuloi golin duke pretenduar se kishte pasur hyrje të parakohshme të lojtarëve në zonë. Megjithatë, pas anulimit, arbitri bëri një gabim teknik duke akorduar goditje dënimi për ekipin kundërshtar, në vend që të urdhëronte përsëritjen e penalltisë ose të validonte golin, siç e kërkojnë rregulloret strikte të lojës. Pas ankesës së bërë nga Woodford Town, FA fillimisht e refuzoi kërkesën, por çështja më pas kaloi në një nënkomision të posaçëm. Ky organ vlerësoi se gabimi i gjyqtarit ishte vendimtar dhe urdhëroi që ndeshja të riluhet. Sfida e përsëritur është caktuar të zhvillohet më 29 shtator, kësaj radhe në stadiumin e Mulbarton.