Skandal në Gjermani: Ish-kreu i BND-së përfundon nën hetim penal për spiunazh dhe sekret shtetëror

Autoritetet gjermane kanë nisur një hetim zyrtar ndaj August Hanning, ish-drejtorit të Shërbimit Federal të Inteligjencës (BND), mbi dyshimet e forta për shfrytëzimin e të dhënave të klasifikuara për qëllime personale konsulence. Sipas burimeve hetimore, Prokuroria Federale po shqyrton veprimtarinë e 80-vjeçarit Hanning për akuza që përfshijnë zotërimin e sekreteve shtetërore dhe vepra penale të barasvlershme me tradhtinë ndaj vendit. Hetuesit dyshojnë se ish-shefi i inteligjencës ka siguruar dokumente konfidenciale nga radhët e BND-së për një periudhë disa vjeçare pas largimit të tij nga funksionet zyrtare. Materialet në fjalë dyshohet se i janë siguruar atij përmes ish-shefit të tij të stafit, i cili tashmë është vënë në pranga nga organet e rendit. Materialet e siguruara përfshijnë raporte të ndjeshme të inteligjencës që kishin për destinacion final Kancelarinë Gjermane. Për më tepër, grupi hetimor po verifikon mundësinë nëse këto informacione sekrete mund të kenë rënë në duart e shërbimeve të huaja. Kjo çështje penale dyshohet se ka marrë jetë pas zbulimit të të dhënave gjatë një hetimi tjetër që lidhej me biznesmenen gjermane Christina Block dhe dyshimet për rrjedhje dokumentesh nga Kancelaria. Detajet e këtij skandali janë bërë publike përmes një hulumtimi të përbashkët të gazetarisë investigative vendase nga disa prej mediave kryesore transmetuese dhe të shkruara në Gjermani.