Gjesti madhështor në heshtje: Ylli i Barcelonës ndihmon prej vitesh qytetin kroat

Futbollisti i njohur i Barcelonës, Dani Olmo, ka dëshmuar anën e tij humane përmes një nisme të fshehtë bamirësie që zgjat prej vitesh, pa dashur kurrë vëmendjen e mediave. Ai ndan rregullisht dy për qind të të ardhurave të tij vjetore bruto për të mbështetur qytetin e Vukovarit në Kroaci. Ky sekret u bë i ditur nga menaxheri i tij, Andy Bara, gjatë një interviste në “Podcast Inkubator”. Ai tregoj se këtë praktikë humanitare Olmo e ka nisur menjëherë pas largimit nga radhët e Dinamo Zagrebit. “Nga momenti kur u largua nga Dinamo, ai ka dhuruar dy për qind të pagës bruto për Vukovarin. Bëhet fjalë për shifra mjaft të larta, duke llogaritur të ardhurat e tij. Këtë angazhim e ka mbajtur gjatë kohës që luante te Leipzigu dhe e ka vijuar pa ndërprerje edhe tani te Barcelona”, u shpreh Bara. Sipas përfaqësuesit të tij, sulmuesi spanjoll ka preferuar gjithmonë modestinë, duke mos folur kurrë vetë për këto ndihma financiare. Megjithëse shfaqi shqetësimin se futbollisti mund të mërzitej për zbulimin, Bara theksoi se ky gjest meriton vlerësim publik. Tregimi i Olmos me vendin ballkanik ka nisur që në rininë e tij të hershme. Në vitin 2014, kur ishte vetëm 16 vjeç, ai mori vendimin e guximshëm për të lënë akademinë e njohur të Barcelonës dhe për të nisur një aventurë të re te Dinamo Zagrebi, ku kaloi rreth gjashtë vite vendimtare për karrierën e tij. Afiniteti i tij i veçantë me Vukovarin lindi pikërisht gjatë atyre viteve të para në Kroaci. Referuar raportimeve vendase, një vizitë dhe turne sportiv në këtë qytet patën ndikim të thellë tek ai, duke i lënë kujtime të pashlyeshme. Pas mbylljes së kapitullit me Dinamon në vitin 2020, Olmo ka vijuar rrugëtimin e tij profesional te gjermani i Leipzigut dhe së fundmi te katalansit e Barcelonës. Pavarësisht ndryshimeve të skuadrave, tradita e dedikimit të dy për qind të pagës bruto nuk ka ndryshuar asnjëherë, sipas dëshmisë së Barës. Në këtë mënyrë, ylli i fushave të blerta dëshmon se lidhja e tij shpirtërore me Kroacinë dhe klubin e Dinamos mbetet e pandryshuar, duke ruajtur një urë të fortë zemre me vendin që i dha shtytjen e parë drejt elitës së futbollit botëror.