Tuchel paralajmëron Anglinë: Spanja është një sfidë e frikshme, duhet strategji e qartë

Anglia po bëhet gati për një prej provave më të vështira të këtij cikli, teksa në kuadër të raundit të parë të Ligës së Kombeve do të përballet me kampionët në fuqi të botës, Spanjën. Kjo përballje prestigjioze është programuar të zhvillohet këtë të shtunë, me fillim nga ora 20:45. Në konferencën për shtyp para këtij takimi, trajneri i “Tre Luanëve”, Thomas Tuchel, nuk i ka kursyer elozhet për kundërshtarin. Ai pranoi se analizimi i lojës së spanjollëve ka nxjerrë në pah një organizim të jashtëzakonshëm defensiv. “Sa më shumë që studiojmë ndeshjet e fundit të Spanjës, aq më shumë na bën përshtypje puna e tyre në mbrojtje”, u shpreh tekniku gjerman. Tuchel vuri theksin te inteligjenca taktike e spanjollëve, të cilët sipas tij dinë ta diktojnë ritmin e lojës dhe t’i detyrojnë kundërshtarët të zhvendosen në krahë, për të nisur më pas presionin e lartë. “Ata janë të pozicionuar në mënyrë perfekte para portës dhe kanë pranuar shumë pak gjuajtje drejt kuadratit”, shtoi ai. Duke parë vështirësinë e ndeshjes, trajneri anglez theksoi nevojën për një qasje luftuese, por edhe të zgjuar. “Do të na duhet të luftojmë fort, por synimi ynë mbetet të gjejmë hapësira për të dominuar. Kemi hartuar një strategji për të krijuar raste dhe çelësi i suksesit do të jetë aftësia jonë për të identifikuar momentin e saktë kur duhet të ushtrojmë presion ndaj tyre”, përfundoi Tuchel.