PDK i kërkon Vetëvendosjes rikthimin në Kuvend: Të miratohet ligji para shpërndarjes së mundshme

Përfaqësues të Partisë Demokratike të Kosovës i kanë bërë thirrje Lëvizjes Vetëvendosje që të bashkohet në seancë plenare për të votuar në lexim të dytë Projektligjin për Dhomat e Specializuara. Kjo thirrje vjen në prag të një shpërndarjeje të mundshme të legjislativit, e cila mund të shkaktohet nga dështimi i zgjedhjes së shefit të shtetit. Nënkryetarja e Kuvendit, e cila vjen nga radhët e PDK-së, Vlora Çitaku, ka theksuar se ky akt ligjor duhet të kalojë pa vendosur kushte paraprake dhe se ai nuk duhet të ndërthuret me procesin e zgjedhjes së presidentit. Duke folur rreth kësaj çështjeje, Çitaku u shpreh se mbrojtja e vlerave të UÇK-së nuk mund të bëhet përmes kushtëzimeve. “I bëjmë thirrje LVV-së që të vijnë në Kuvend dhe ta miratojnë në lexim të dytë ligjin për Dhomat e Specializuara. Kjo nuk është favor, është detyrë dhe obligim. Ne jemi në sallë dhe nuk do të largohemi... Nuk duhet UÇK-ja me kushte. Nuk mbrohet UÇK-ja me kushte. S’ka kushte, nuk pranojmë kushte”, deklaroi ajo. Apelit të partisë iu bashkua edhe kreu i Grupit Parlamentar të PDK-së, Arian Tahiri, i cili insistoi që ky projektligj të marrë dritën jeshile përpara çdo skenari të shpërndarjes së institucionit ligjvënës. Tahiri theksoi se ky hap përbën një detyrim madhor shtetëror për të gjithë aktorët politikë, duke hedhur poshtë çdo përpjekje për pazare politike lidhur me këtë proces. “Është obligim dhe përgjegjësi kombëtare e secilës forcë politike që të vijë në Kuvend dhe në këto orë që kanë mbetur, para se të shpërndahet Kuvendi, eventualisht, nëse shpërndahet, ta miratojmë ligjin në lexim të dytë... Ata po tentojnë të bëjnë pazar. Ta votojë ligjin në lexim të parë, voto ma presidentin, ta votojë ligjin. Kjo është pazar dhe është e pandershme”, përfundoi ai.