Tragjedi në SHBA: Përmbyset autobusi i shkollës në Florida, humbin jetën dy persona mes tyre një nxënëse

Një ngjarje e rëndë ka tronditur shtetin e Floridës në Shtetet e Bashkuara të Amerikës, ku një autobus shkollor është përfshirë në një aksident masiv me disa automjete, duke lënë të vdekur dy persona, përfshirë një nxënëse të klasës së dhjetë. Nga ky përplasje e fuqishme kanë mbetur të plagosur edhe disa persona të tjerë, ndërkohë që gjendja shëndetësore e njërit prej tyre vijon të jetë kritike për jetën. Ngjarja tragjike ndodhi gjatë mëngjesit të së hënës në zonën qendrore të Floridës. Autobusi po transportonte nxënësit drejt institucionit arsimor "Winter Haven High School" në qytetin Winter Haven. Sipas informacioneve të bëra publike nga sherifi i qarkut Polk, Grady Judd, tragjedia nisi pak pas orës 06:00 të mëngjesit. Një makinë që po lëvizte në drejtim të kundërt ka kaluar në krahun tjetër të rrugës dhe është përplasur me pjesën e pasme të autobusit, duke shkaktuar shkëputjen e njërës prej gomave. Pas këtij momenti, automjeti i transportit shkollor është përplasur ballazi me një fuoristradë tip Jeep, e cila menjëherë është përfshirë nga flakët. Drejtuesi i këtij mjeti ka ndërruar jetë në vend. Statistikat zyrtare tregojnë se në bordin e autobusit ndodheshin gjithsej 39 persona, ku përfshiheshin 37 nxënës të shkollës së mesme, shoferi dhe vajza e tij. Autoritetet lokale njoftuan se pesë deri në shtatë persona u dërguan me urgjencë në spital për shkak të lëndimeve të rënda që kishin pësuar, ndërsa njëri prej tyre po lufton për jetën. Forcat e shpëtimit dhe ekipet e emergjencës operuan në vendngjarje për disa orë me radhë, duke u angazhuar në nxjerrjen e të plagosurve, identifikimin e tyre dhe organizimin e procesit për t'i bashkuar nxënësit me familjet e tyre. Sherifi Grady Judd e ka përshkruar këtë ngjarje si një ndër aksidentet më tragjike të regjistruara ndonjëherë me mjete të transportit shkollor gjatë dekadave të fundit. "Ishte një aksident i tmerrshëm. Ishte një mëngjes tragjik. Një vajzë e bukur e klasës së 10-të humbi jetën", u shpreh ai gjatë deklaratës për mediat.