Daut Haradinaj: Kurti po luan kartën e fundit për të çuar vendin drejt zgjedhjeve të parakohshme

Kryeministri Albin Kurti po ndërmerr lëvizjen e tij të fundit për të dërguar Kosovën në zgjedhje të reja, sipas vlerësimit të ish-deputetit të Aleancës për Ardhmërinë e Kosovës, Daut Haradinaj. Gjatë një deklarate publike, Haradinaj ka theksuar se zhvillimet e fundit politike nuk kanë asnjë lidhje me ndonjë vullnet për bashkëpunim, por përkundrazi, ato përbëjnë një tentativë të hapur për të ushtruar shantazh ndaj Partisë Demokratike të Kosovës. “Këtu nuk bëhet fjalë për bashkëpunim. Unë mendoj që z.Kurti është duke e përdorur kartën e fundit për ta shantazhuar PDK-në dhe vendin ta dërgojë në zgjedhje. Por, të jeni të sigurt që nuk do të kalojë lehtë, për shkak se populli është i frustruar, sheshet e Evropës dhe të Kosovës janë mbushur më qytetarë të cilët kërkojnë drejtësi dhe thonë “Jo në emrin tim”, i bjen që Kuvendi i Kosovës duhet të flasë në emër të popullit”, është shprehur Haradinaj. Në fund, ai ka paralajmëruar deputetët për pasojat e mundshme të veprimeve të tyre institucionale, duke bërë thirrje për reflektim të thellë rreth vendimeve që merren. “Nëse ata i shmangen vullnetit qytetarë dhe nuk votojnë sonte, ata do të jenë pjesë e një vendimi katastrofal historik, do të jenë pjesë e atyre që janë gëzuar në Beograd, në rastin e z.Thaçi me kolegë”, ka përfunduar deklaratën e tij Haradinaj.