Gruda: Kushtëzimi i votës për Presidentin me atë të Speciales, veprim i pandershëm

Deputeti i Partisë Demokratike të Kosovës (PDK), Përparim Gruda, i ftuar në emisionin “Tempus”, ka komentuar çështjen e votimit të ligjit për Gjykatën Speciale, duke theksuar se do të përbënte një qasje të padrejtë nëse partisë së tij i kërkohet vota për kreun e shtetit në këmbim të këtij procesi. Gruda u shpreh se ka shpresa që një kushtëzim i tillë të mos ndodhë gjatë diskutimeve për zhbërjen e Speciales. Megjithatë, ai bëri të qartë se edhe nëse një skenar i tillë vihet në tavolinë, PDK-ja mbetet e palëkundur në angazhimin e saj për të ndërmarrë çdo hap të nevojshëm në mbrojtje të ish-drejtuesve të Ushtrisë Çlirimtare të Kosovës (UÇK). Duke u ndalur te qëndrimi i Lidhjes Demokratike të Kosovës (LDK) karshi këtij projektligji në Kuvend, deputeti i PDK-së vuri në dukje se shqetësimet e kësaj partie lidhur me vrasjet e pasluftës janë të kuptueshme, por shtoi se asnjë nga ato raste nuk përfshihet në aktakuzat e ngritura ndaj ish-krerëve të UÇK-së. “I kuptoj shqetësimet që i kanë njerëzit e LDK-së për vrasjet politike pas luftës, por asnjë nga vrasjet politike nuk është në aktakuzë dhe në vendimin dënues”, u shpreh ai gjatë emisionit. Në lidhje me Lëvizjen Vetëvendosje (VV), Gruda potencoi se krenaria e shprehur nga kjo forcë politike për mosvotimin e Gjykatës Speciale në të kaluarën, duhet të dëshmohet edhe në situatën aktuale përmes mbështetjes së nismës së PDK-së. “Nëse VV-ja krenohet sot se nuk e ka votu Gjykatën Speciale, është koha me e bo testin. Sa të sinqertë kanë qenë atëherë, matet me votën sot këtu”, përfundoi Gruda.