Vullnet Krasniqi: LDK po rikthehet fuqishëm në skenën politike, dinamika e re është LDK kundër VV-PDK

Gazetari i njohur Vullnet Krasniqi ka komentuar vendimin e Lidhjes Demokratike të Kosovës për të mos mbështetur ndryshimet e propozuara në Ligjin për Gjykatën Speciale. Sipas tij, ky hap përbën një kthesë domethënëse dhe një ripozicionim të qartë në arenën politike vendase, duke e sjellë sërish LDK-në në qendër të vëmendjes dhe duke krijuar një skenar të ri përballjeje: LDK përballë boshtit VV-PDK. Krasniqi theksoi gjithashtu se ky subjekt politik ka obligim që argumentet e veta juridike t'i shndërrojë në një mesazh të kuptueshëm politik për opinionin publik. Në reagimin e tij, ai u shpreh: “LDK foli. Pas një periudhe heshtjeje apo mungese në skenë, ky qëndrim kundër projektligjit shënon një ripozicionim strategjik dhe një rikthim në politikë. Tani kemi një formulë të re: LDK kundër VV-PDK. Nëse kjo parti arrin t'u bëjë ballë sulmeve populiste për gjoja tradhti dhe di ta shpjegojë bazën juridike përmes një narracioni të fortë politik, ajo ka potencialin të pozicionohet si forca e dytë në vend”.