Konjufca nga OKB: Bashkëpunimi në Ballkan kërkon barazi, sovranitet dhe besim të ndërsjellë

Zëvendëskryeministri i Kosovës, Glauk Konjufca, ka theksuar se partneriteti në nivel rajonal duhet të ndërtohet mbi parimet e besimit të ndërsjellë, barazisë së plotë, si dhe respektimit të paprekshmërisë territoriale dhe sovranitetit. Këto deklarata ai i ka bërë të ditur përmes një shkrimi në platformën X, ndërkohë që po merr pjesë në ngjarjet e Nivelit të Lartë të Sesionit të 81-të të Asamblesë së Përgjithshme të OKB-së në New York. Ai bëri me dije se ka marrë pjesë në drekën e punës të organizuar bashkërisht nga Procesi i Bashkëpunimit të Evropës Juglindore (SEECP) dhe Nisma e Evropës Qendrore (CEI). Me këtë rast, ai i ka drejtuar një falënderim ministres së Jashtme të Rumanisë, Oana Țoiu, për pritjen dhe organizimin e tryezës kushtuar perspektivës së bashkëpunimit në rajon. “Në kohën kur përkojmë me trevjetorin e agresionit terrorist në Banjskë, ku humbi jetën tragjikisht rreshteri i Policisë së Kosovës, Afrim Bunjaku, unë theksova se çdo bashkëpunim duhet domosdoshmërisht të mbështetet te besimi, barazia dhe respekti për sovranitetin e integritetin territorial”, ka shkruar numri dy i ekzekutivit kosovar. Sipas tij, ky qasje merr një peshë edhe më të madhe në periudhën aktuale, kur Evropa dhe Ballkani Perëndimor po përballen me sfida të shtuara nga rreziqet hibride dhe tensionet gjeopolitike. “Për Republikën e Kosovës, bashkëpunimi rajonal duhet të shërbejë si plotësim dhe jo si zëvendësim i rrugëtimit tonë evropian, duke prodhuar njëkohësisht efekte të prekshme përmes zhvillimit të tregtisë, sektorit energjetik, lidhjeve digjitale, mobilitetit dhe qasjes së qëndrueshme”, ka shtuar tutje Konjufca. Ai gjithashtu ka vlerësuar se këto nisma e platforma rajonale duhet të maten bazuar në dobitë konkrete që sjellin për jetën e qytetarëve. “Gjeneratat e reja kërkojnë perspektivë, liri lëvizjeje dhe kushte më të mira jetese, prandaj obligimi ynë mbetet konkretizimi i këtyre mundësive brenda hapësirës sonë rajonale”, ka përmbyllur ai.