Bashkëpunim ndërkombëtar: Pesë pjesëtarë të FSK-së përfundojnë me sukses trajnimin e organizuar nga Ushtria Kanadeze

Në kuadër të partneritetit të vazhdueshëm ndërmjet Forcës së Sigurisë së Kosovës dhe forcave të armatosura të Kanadasë, pesë oficerë të FSK-së janë bërë pjesë e kursit të specializuar “Defence Resource Management Course”, i cili është zhvilluar në Bosnje dhe Hercegovinë nënn organizimin e Ushtrisë Kanadeze. Ky program trajnimi u mbajt gjatë periudhës nga 28 shtatori deri më 4 tetor. Gjatë këtyre ditëve, zyrtarët kosovarë patën mundësinë të thellojnë njohuritë e tyre në fusha kyçe si menaxhimi i resurseve të mbrojtjes, administrimi i projekteve, procedurat e prokurimit dhe zhvillimi i burimeve njerëzore. Sipas informacioneve të publikuara nga FSK-ja, gjatë këtij aktiviteti akademik dhe ushtarak janë shfaqur praktikat dhe përvojat më të mira të Ushtrisë Kanadeze. Qëllimi kryesor ka qenë shkëmbimi i eksperiencave dhe përzgjedhja e metodologjive që mund të integrohen me sukses brenda strukturave të FSK-së. “Angazhimi në këtë lloj aktiviteti ndikon drejtpërdrejt në ngritjen e standardeve profesionale të stafit tonë, mundëson përvetësimin e standardeve ndërkombëtare dhe e intensifikon bashkëpunimin tonë strategjik me aleatët në sektorin e mbrojtjes”, është theksuar në komunikatën zyrtare të FSK-së.