Haradinaj u bën thirrje ligjvënësve: Votimi kundër Gjykatës Speciale është mundësi jetësore

Ish-deputeti i Aleancës për Ardhmërinë e Kosovës, Daut Haradinaj, e ka cilësuar si një mundësi me peshë jetësore dhe historike përfaqësimin e qytetarëve në Kuvend, nëse vendoset shfuqizimi i Gjykatës Speciale. Edhe pse nisma ka kaluar tashmë fazën e leximit të parë, Haradinaj vlerëson se anëtarët e Kuvendit ruajnë ende shansin për të marrë një vendim në shërbim të votuesve dhe të gjithë atyre protestuesve që dolën në mbrojtje të vlerave të luftës, si në sheshin e Prishtinës ashtu edhe anembanë diasporës. “Për mua personalisht mendoj që është akt historik e jetësor për një deputet me votu shfuqizimin e Gjykatës Speciale në këtë rast. E di që ka kaluar në lexim të parë, por shpresoj që deputetët në emër të popullit, në emër të qytetarëve që i përfaqësojnë, gjithë ata protestues jo vetëm në Sheshin e Prishtinës, por kudo në botë, e kanë shansin historik me votu sot”, është shprehur ai. Gjatë prononcimit të tij, ai ka vënë inatin te rëndësia e ndërgjegjësimit politik, duke shtuar se vota e secilit ligjvënës do të jetë përcaktuese për fatin dhe drejtimin që do të marrë ky proces i ndjeshëm. “E ndërgjegjësimi, e kemi thënë, vota është ajo e cila përcakton se ku do të shkojë, ku do të marrë drejtim ky proces”, ka theksuar Haradinaj. Duke e vënë theksin te legjitimiteti institucional, ai ka shtuar se Parlamenti i Kosovës mbetet e vetmja adresë e besueshme dhe kredibile, qoftë brenda vendit apo në rrafshin ndërkombëtar, për të marrë një vendim të tillë. “Nuk ka institucion tjetër kredibil as në nivel botëror përpos Parlamentit të Kosovës”, u shpreh ish-deputeti. Në fund, Haradinaj ka lëshuar një paralajmërim të qartë politik se refuzimi i kësaj nisme do të shoqërohet me llogaridhënie të drejtpërdrejtë para qytetarëve të vendit. “E këta e kanë shansin, në rast se nuk votojnë do të mbajnë përgjegjësi, do të japin përgjegjësi para qytetarëve”, përfundoi ai.