Haxhiu bën thirrje për konsensus politik: Zgjedhja e presidentit prioritet mbi çdo çështje tjetër

Kryetarja e Kuvendit dhe ushtruesja e detyrës së presidentes së Kosovës, Albulena Haxhiu, i ka bërë thirrje Grupit Parlamentar të Partisë Demokratike të Kosovës (PDK) që të heqë dorë nga nisma procedurale për miratimin e Projektligjit për ndryshimin e Ligjit për Dhomat e Specializuara në lexim të dytë. Sipas Haxhiut, ndërhyrja në rendin e ditës në mes të pikave të seancës përbën veprim të papranueshëm, sidomos duke pasur parasysh ekzistencën e një dakordimi paraprak mes drejtuesve të Lëvizjes Vetëvendosje dhe atyre të PDK-së. Ajo ka ftuar liderët e subjekteve politike që të ulen në tryezën e bisedimeve dhe të arrijnë një marrëveshje për çështjen e kreut të shtetit, duke e konsideruar këtë hap si jetik për mbarëvajtjen e institucioneve të vendit dhe shmangien e një krize të re. Haxhiu theksoi se pavarësisht aftësisë së Kuvendit për të nxjerrë ligje, dështimi në zgjedhjen e presidentit dhe dërgimi i vendit sërish në zgjedhje të parakohshme do të rëndonte edhe më shumë gjendjen institucionale. Duke arsyetuar këtë qëndrim, ajo u shpreh: “Nuk është në rregull që të ndërhyni midis pikave të rendit të ditës. Ne e kuptojmë ndjeshmërinë dhe rëndësinë e çështjes. Dakordimi ishte që pas takimit të kryetarëve, përkatësisht të LVV-së dhe kryetarit të PDK-së, mund të vijmë me një dakordim për çështjen në fjalë. Kështu ishte marrëveshja dhe nuk e kuptoj që, pa kaluar pak kohë, vini dhe e ndryshoni qëndrimin. Unë ju inkurajoj që, për shkak pikërisht të urgjencës që kemi, sensitivitetit dhe rëndësisë pas vendimit të 16 shtatorit, është shumë e rëndësishme që të jemi bashkë dhe t’i japim vendit president, sepse ne mund të hartojmë ligjin. Por ata atje, nëse ne shkojmë të zgjedhim, mbesin vetëm. Prandaj, unë sot ju ftoj, edhe si kryetare e Kuvendit, edhe si ushtruese e detyrës së presidentes, takohuni, merruni vesh dhe ejani në seancë. Nuk ka më të rëndësishme, po e përsëris, se presidenti, jo për shkak të emrit të përveçëm, por nuk mund ta çojmë vendin në zgjedhje për herë të dytë për shkak të presidentit. Është papërgjegjësi, është moskokëçarje në raport me përgjegjësitë që i kemi para qytetarëve të Republikës së Kosovës. Pra, ju lutem që të veproni në përputhje me përgjegjësinë”. Në anën tjetër, shefi i deputetëve të PDK-së, Arian Tahiri, ka kundërshtuar këtë qasje përmes një replike, duke argumentuar se rrethimi i Kuvendit me qytetarë kërkon reagim institucional dhe jo shpërfillje të situatës. “Në këtë moment, qyteti i Prishtinës dhe Kuvendi i Kosovës është i rrethuar me shqiptarë të Kosovës që kanë ndjeshmëri për këtë çështje. Ne nuk duhet të sillemi dhe veprojmë sikurse nuk është duke ndodhur asgjë. Po kërkojmë që të votohet në lexim të dytë dhe bëhet fuqiplotë”, u shpreh ai. Pavarësisht insistimit të opozitës dhe diskutimeve të zhvilluara, kryetarja e Kuvendit nuk e hodhi në votim mocionin e propozuar nga PDK-ja, duke vijuar punimet me pikat e tjera të parapara në rendin e ditës.