Kolaps energjetik në Londër: Defekti nëntokësor lë mijëra banorë dhe biznese në errësirë

Një defekt teknik në rrjetin nëntokësor ka lënë pa energji elektrike një pjesë të konsiderueshme të Londrës qendrore gjatë orëve të para të mëngjesit të hënë. Sipas të dhënave nga kompania e shpërndarjes UK Power Networks, ndërprerja ka përfshirë rreth 32 kode postare, duke prekur kryesisht zonën e Shoreditch dhe sektorë të ndryshëm të Londrës lindore, çka solli paralizimin e mijëra shtëpive dhe njësive tregtare. Incidenti u regjistrua rreth orës 10:32, duke krijuar vështirësi edhe në stacionin hekurudhor London Liverpool Street, ku sistemet digjitale u fikën, ndërsa veprimtaria në zyrat dhe bizneset përreth u ndërpre përkohësisht. Ekipeve të UK Power Networks iu zu vetëm një çerek ore kohë për të nisur procedurat e ridrejtimit të rrymës përmes rrugëve alternative. Fillimisht, drita u rikthye në zonën E8, për t'u shtuar më pas në të gjitha hapësirat e prekuara nga ky bllokim. Operacionet e riparimit përfunduan plotësisht rreth orës 12:09, duke bërë që i gjithë rrjeti të rifunksionojë përpara afatit të parashikuar nga kompania, e cila kishte llogaritur rikthimin e plotë të furnizimit ndërmjet orës 12:00 dhe 13:00. Në një prononcim zyrtar, UK Power Networks bëri të ditur se specialistët arritën të izolonin dëmtimin e kabllit nëntokësor duke përdorur linja alternative, ndërkohë që u ka bërë thirrje konsumatorëve që ende hasin vështirësi tregtare apo familjare të lidhen drejtpërdrejt me shërbimin e klientit.