Skandali i SPAK/ Salianji: Fondet e mbrojtjes dhe armatimeve përfunduan te hipizmi në Equos Resort

Ish-deputeti i Partisë Demokratike, Ervin Salianji, ka lëshuar akuza të ashpra lidhur me veprimet e fundit të Prokurorisë së Posaçme (SPAK), e cila ka ndërmarrë kontrolle ndaj Ron Yeffet, Ardi Veliut dhe subjekteve të lidhura me kompaninë KAYO, në kuadër të hetimeve për dyshimet rreth trafikut ndërkombëtar të armëve. Sipas politikanit opozitar, fondet publike të akorduara për mbrojtjen kombëtare dhe pajisjet ushtarake dyshohet se janë keqpërdorur për ngritjen e një kompleksi për kuajt dhe sportin e hipizmit brenda ambienteve të Equos Resort. Salianji thekson se kompania "Timak", e cila është e lidhur ngushtë me KAYO-n, ka përfituar kontrata shtetërore për armatime, ndërkohë që paralelisht ka krijuar biznesin "Timak Horse". Hetuesit e SPAK poverifikojnë pikërisht këtë pistë, pas sekuestrimit të dokumentacionit dhe kontratave përkatëse. "TIMAK merr kontrata me shtetin për mbrojtjen dhe pajisjet ushtarake, ndërkohë hapet “Timak Horse”, biznes kuajsh në Equos Resort. Sot kjo pistë po verifikohet nga SPAK pas sekuestrimit të dokumenteve dhe kontratave. Ky nuk është më vetëm korrupsion. Është përshesh i turpit", shprehet ai në reagimin e tij. Duke vënë theksin te kushtet e vështira të Forcave të Armatosura, ish-deputeti ngre shqetësimin se ndërsa ushtarët përballen me paga të ulëta dhe mungesë pajisjesh, fondet publike shkojnë për mbarështimin e kuajve të qeverisë, në një kohë kur vendi vuan për mjete bazë emergjencash si avionët zjarrfikës. Mbyllur deklaratën e tij, Salianji nënvizon se Shqipëria nuk mund të trajtohet si pronë apo kasafortë private e pushtetit, duke shtuar se buxheti i ushtrisë i takon mbrojtjes dhe se vetëm largimi i qeverisë aktuale mund t'i jepë fund këtij cikli korrupsioni.