Kërcënim me jetë ndaj Rexhep Selimit, reagon ashpër bashkëshortja dhe kërkon ndërhyrjen e Prokurorisë

Një koment skandaloz i publikuar në rrjetet sociale, ku bëhet thirrje e hapur për eliminimin fizik të Rexhep Selimit sapo ai të rikthehet në tokën shqiptare, ka shkaktuar shqetësim të madh dhe ka sjellë reagimin e menjëhershëm të bashkëshortes së tij, Shqipe Mehmeti Selimi. Ajo e ka cilësuar këtë ngjarje si një kërcënim alarmant, duke i kërkuar zyrtarisht Prokurorisë së Shtetit që të vërë në lëvizje mekanizmat hetues, të zbulojë identitetin e autorit dhe të ndërmarrë hapat ligjorë përkatës. "Sot, përmes raportimeve në mediat e shkruara, u njoftova për një koment publik në rrjetet sociale, në të cilin bëhet thirrje e drejtpërdrejtë për ekzekutimin e bashkëshortit tim, Rexhep Selimit", ka deklaruar ajo. Duke u shprehur si bashkëshorte dhe njëkohësisht si qytetare e Republikës së Kosovës, ajo ka theksuar se një situatë e tillë është tejet e rëndë dhe nuk guxon të kalojë në heshtje apo pa u hetuar nga organet e zbatimit të ligjit. Sipas saj, dallimet ideologjike, bindjet politike apo opinioni i secilit nuk mund të përdoren kurrë si alibi për të nxitur vrasjen e një individi, ndërsa ka shtuar se liria e shprehjes nuk duhet të keqpërdoret asnjëherë si mbulesë për dhunë. Në këtë kuadër, ajo i ka drejtuar një thirrje publike Prokurorisë së Shtetit që, brenda fushëpërgjegjësisë së saj ligjore, të nisë hetimet për këtë rast, të identifikojë autorin e këtij komenti dhe të përcaktojë përgjegjësinë penale. "Nuk kërkoj asgjë më shumë dhe asgjë më pak sesa zbatimin e ligjit dhe trajtimin me seriozitetin e duhur të një thirrjeje publike për marrjen e jetës së një njeriu", ka shkruar ajo. Në fund, ajo ka paralajmëruar se tolerimi dhe normalizimi i një gjuhe të tillë urrejtjeje janë plotësisht të patolerueshme, duke nënvizuar se institucionet e drejtësisë kanë detyrimin moral dhe ligjor që t'i japin përgjigjen e merituar këtyre rasteve, pa marrë parasysh se kujt i adresohen ato.