Shtatë gola në Rijekë, por heroizmi i Livakoviçit shpëtoi Kroacinë nga një katastrofë historike

Përfaqësuesja e Kroacisë ka regjistruar një nga disfatat më të rënda në histori, pasi u mbyll takimi i tretë i Ligës së Kombeve me rezultat 0:7 në favor të Anglisë, sfidë kjo e zhvilluar në Rijekë. Përkundër kësaj tronditjeje në fushë, vëmendja e opinionit sportiv ndërkombëtar është fokusuar te gardiani kroat. Sipas prestigjiozes spanjolle “Mundo Deportivo”, paraqitja e portierit Dominik Livakoviç ishte e vetmja pikë pozitive që parandaloi një rezultat edhe më poshtërues. Në analizën e saj, gazeta theksoi se “po të mos ishte Livakoviç, humbja e Kroacisë do të ishte edhe më e rëndë”, duke vlerësuar pritjet vendimtare gjatë 90 minutave. Anglia e nisi ndeshjen në mënyrë të furishme dhe brenda 21 minutave të para krijoi epërsi prej dy golash përmes Harry Kane dhe Jude Bellingham. Presioni nuk u ul as para pushimit të pjesës së parë, ku Anthony Gordon dhe Bukayo Saka thelluan shifrat në 4:0. Në këtë periudhë, Livakoviç mbajti peshën kryesore duke ndalur dy herë radhazi Gordonin, fillimisht në një duel kokë më kokë dhe më pas në një goditje nga afërsia. Edhe pse pësoi shtatë herë, shtylla e portës kroate bëri çmos, ndërsa ekspertët spanjollë vunë në dukje se në shumicën e golave portieri nuk kishte si të ndërhynte për shkak të pasigurisë totale të mbrojtjes. Përpjekjet e përzgjedhësit kroat për të ndryshuar rrjedhën e lojës përmes tri zëvendësimeve në pjesën e dytë nuk dhanë fryt. Kane shënoi golin e tij të dytë personal në minutën e 53-të, Saka realizoi sërish në minutën e 68-të, ndërsa epilogun prej 0:7 e vulosi Morgan Rogers në minutën e 87-të. Kjo disfatë shënon momentin më të errët në historinë e kombëtares kroate, e cila pas tri ndeshjeve mbetet me kuotën e tri pikëve. Koha për analizë dhe rimëkëmbje është tejet e shkurtër, pasi më 6 tetor Kroacia do të presë Spanjën në stadiumin ‘Polud’. Nga ana tjetër, spanjollët vijnë në këtë përballje pas triumfit të mëparshëm 4:1 ndaj kroatëve dhe kryesojnë grupin me 9 pikë të plota pas tri xhirove, falë fitoreve të njëpasnjëshme kundër Anglisë, Kroacisë dhe Çekisë.