Tragjedi në Greqi: Dy miq shqiptarë humbin jetën pas një përplasjeje të fortë mes motorit dhe skuterit

Një ngjarje e rëndë ka tronditur komunitetin shqiptar në Greqi, pasi një aksident fatal trafiku në zonën e Nea Peramos, në Kavallë, i ka kushtuar jetën dy të rinjve nga Shqipëria. Aksidenti tragjik ndodhi pasditen e së shtunës, në aksin rrugor që lidh Nea Peramos me zonën e njohur turistike të plazhit të Ammolofëve. Përplasja e fuqishme ndodhi mes një motoçiklete dhe një skuteri elektrik, duke lënë të plagosur rëndë drejtuesit e të dy mjeteve. Si pasojë e dëmtimeve të marra, 34-vjeçari që drejtonte motoçikletën ndërroi jetë në vendngjarje. Ndërkohë, drejtuesi tjetër, një 36-vjeçar që po lëvizte me skuterin elektrik, u dërgua me urgjencë në Spitalin e Përgjithshëm të Kavallës, ku u shtrua në Repartin e Terapisë Intensive. Pavarësisht ndërhyrjes dhe përpjekjeve intensive të stafit mjekësor, ai nuk ka mundur t'u mbijetojë plagëve, duke ndërruar jetë gjatë orëve të natës. Burimet lokale konfirmojnë se dy viktimat ishin me origjinë nga Shqipëria dhe njiheshin si miq mes tyre. Ndërkohë, autoritetet policore greke kanë nisur hetimet zyrtare për të zbardhur shkaqet dhe dinamikën e saktë të këtij aksidenti të rëndë, pasi detajet rreth rrethanave të ngjarjes mbeten ende të paqarta.