Aksion rrufeshëm i policisë: Ndalohen 12 drejtues mjetesh, spikat numri i lartë i atyre që ngisnin makinën pa patentë

Gjatë 24 orëve të fundit, strukturat policore në rajone të ndryshme të vendit kanë ndaluar dhe shoqëruar në stacione 12 drejtues mjetesh. Sipas autoriteteve, këta persona dyshohet se kanë kryer veprën penale të "drejtimit të pakujdesshëm të automjetit", e cila sanksionohet nga neni 297-a i Kodit Penal. Sipas njoftimit zyrtar të Ministrisë së Punëve të Brendshme (MPB), nëntë nga personat e ndaluar drejtuar automjetet pa pasur fare patentë shoferi. Bëhet fjalë për shtetasit: D.D. (26) nga Shkupi, M.B. (29) nga fshati Cërn Vërv i Shkupit, M.P. (18) nga fshati Mërshevci i Shkupit, një 15-vjeçar nga fshati Studeniçan i Shkupit, N.B. (48) nga Manastiri, A.A. (44) nga Manastiri, I.K. (51) nga fshati Viniçani i Komunës së Gradskos, një 16-vjeçar nga Velesi, si dhe L.M. (61) nga fshati Stamer i Dellçevës. Po ashtu, gjatë kontrolleve në terren, policia ka kapur duke drejtuar mjetin nën efektin e alkoolit dhe në kohë ndalimi aktiv dy persona: B.B. (60) nga fshati Zajas i Kërçovës dhe M.M. (37) nga Velesi. Ndërkaq, vetëm nën ndikimin e alkoolit është konstatuar duke drejtuar automjetin shtetasi L.Xh. (48) nga fshati Razllovc i Dellçevës. Autoritetet kompetente bëjnë me dije se pas zbardhjes dhe dokumentimit të plotë të të gjitha rasteve, ndaj shkelësve do të ngrihen kallëzimet përkatëse penale. Në lidhje me këto ngjarje, MPB ka përcjellë një apel publik për të gjithë drejtuesit e mjetit dhe qytetarët: “U bëjmë apel të gjithë pjesëmarrësve në komunikacion që t’i respektojnë rregullat dhe dispozitat e komunikacionit, të mos drejtojnë automjet pa e dhënë provimin e vozitjes ose nëse u është shqiptuar masë ndalimi për drejtimin e automjetit ose nëse janë nën ndikimin e alkoolit dhe të gjithë së bashku të kontribuojmë për siguri më të madhe në komunikacion”.