Tragjedi në Greqi: Dy miq shqiptarë humbin jetën pas një përplasjeje fatale në Kavallë

Një ngjarje e rëndë ka tronditur komunitetin shqiptar në Greqi, pasi mbrëmjen e djeshme, dy të rinj nga Shqipëria humbën jetën tragjikisht në një aksident rrugor të regjistruar në Nea Peramos të Kavallës. Viktimat e këtij incidenti fatal janë identifikuar si Arditi, 34 vjeç, dhe Marigleni, 36 vjeç. Burimet bëjnë me dije se të dy ishin miq të ngushtë me njëri-tjetrin. Aksidenti i rëndë ndodhi në aksin rrugor që lidh Nea Peramos me zonën e Ammolofoit, ku u përfshinë në një përplasje të dhunshme një motor dhe një monopatinë elektrike. Si pasojë e impaktit të fortë, drejtuesi i motorit, 34-vjeçari Arditi, ndërroi jetë në vend. Ndërkaq, miku i tij Marigleni, i cili po lëvizte me monopatinë elektrike, u dërgua me urgjencë dhe në gjendje kritike për jetën në Spitalin e Përgjithshëm të Kavallës. 36-vjeçari iu nënshtrua një ndërhyrjeje kirurgjikale emergjente, mirëpo pavarësisht përpjekjeve maksimale të stafit mjekësor, ai nuk mundi t'i mbijetonte plagëve dhe ndërroi jetë gjatë orëve të para të mëngjesit, duke e çuar në dy numrin e viktimave. Humbja e parakohshme dhe e papritur e dy miqve ka lënë pas dhimbje të madhe për familjarët, të afërmit dhe të gjithë ata që i njihnin. Ndërkohë, autoritetet kompetente greke po vazhdojnë hetimet intensive për të zbardhur plotësisht dinamikën dhe shkaqet e këtij aksidenti tragjik.