Miratimi i Ligjit për Dhomat e Specializuara, Tahiri: Kuvendi të mos bëjë lojëra nesër

Deputeti i Aleancës për Ardhmërinë e Kosovës, Besnik Tahiri, i ka bërë thirrje Kuvendit që gjatë seancës së nesërme të miratojë në të dy leximet Ligjin për Dhomat e Specializuara. Përmes një reagimi në rrjetet sociale, ai ka theksuar se ky akt ligjor duhet të shërbejë vetëm si pikënisje për një angazhim më të gjerë shtetëror në mbrojtjen e vlerave të luftës çlirimtare dhe historisë sonë. Duke iu drejtuar kolegëve deputetë, Tahiri ka kërkuar që kjo temë të mos shihet si terren për përleshje politike, duke shtuar se amendamentet e mundshme duhet të analizohen me shumë kujdes gjatë leximit të dytë. “Nesër nuk duhet të bëhet lojë me asnjërin lexim”, ka shkruar ai. Ligjvënësi i AAK-së ka shtuar gjithashtu se nëse Komisioni për Legjislacion ka lënë pa përfshirë ndonjë aspekt të rëndësishëm, duhet të ndërhyhet me amendamentet e duhura për të përmirësuar tekstin e ligjit. Në vlerësimin e tij, Kosova ka nevojë urgjente për një qasje të unifikuar dhe serioze institucionale karshi procesit gjyqësor që po zhvillohet në Hagë. Sipas Tahirit, dy vitet e ardhshme kërkojnë seriozitet maksimal nga ana e shtetit në këtë drejtim. “Nesër nuk duhet të jetë fundi i një debati, por fillimi i një pune më të madhe të shtetit për çlirimtarët”, ka përfunduar shkrimin e tij deputeti Tahiri.