Zgjidhja e ngërçit politik, Hamza këmbëngul: Së pari ndryshimet për Dhomat e Specializuara, pastaj çështja e presidentit

Kryetari i Partisë Demokratike të Kosovës (PDK), Bedri Hamza, ka rikonfirmuar pozicionin e subjekti që ai drejton, sipas të cilit tejkalimi i bllokadës institucionale duhet të hapë rrugë vetëm përmes miratimit të ligjit për Dhomat e Specializuara në të dy leximet paraprakisht. Në kuadër të këtyre zhvillimeve, lideri i PDK-së, Bedri Hamza, ka thirrur për sot në orën 14:00 një mbledhje të përbashkët të Kryesisë dhe Grupit Parlamentar të kësaj partie. Gjatë këtij takimi, ai pritet të njohë bashkëpartiakët me detajet dhe epilogun e bisedave të zhvilluara me kryetarin e Lëvizjes Vetëvendosje, Albin Kurti, ku fokusi kryesor ka qenë reformimi i Ligjit për Dhomat e Specializuara. Me përfundimin e mbledhjes, kreu i PDK-së do të paraqitet para përfaqësuesve të medieve për të ndarë qëndrimet zyrtare.