Tragjedi në Tiranë: I riu përplas për vdekje kalimtaren 75-vjeçare, vihet në pranga 20-vjeçari

Një ngjarje e rëndë ka tronditur kryeqytetin mbrëmjen e 3 tetorit, ku një grua e moshuar ka ndërruar jetë si pasojë e një aksidenti rrugor, pasi është goditur nga një motomjet. Aksidenti fatal ka ndodhur rreth orës 19:35 në Rrugën e Dibrës. Burimet zyrtare nga policia bëjnë me dije se motomjeti që drejtohej nga 20-vjeçari Eri Markaj ka përplasur këmbësoren Shpëtime Muça, 75 vjeçe. Për shkak të plagëve të marra, e moshuara është dërguar urgjentisht në spital për të marrë trajtimin e nevojshëm mjekësor. Megjithatë, pavarësisht ndërhyrjes dhe përpjekjeve maksimale të stafit mjekësor, ajo nuk ka mundur t'u mbijetojë plagëve, duke ndërruar jetë rreth orës 22:40. Nga përplasja ka mbetur i lënduar edhe drejtuesi i motorit, Eri Markaj, i cili aktualisht po merr kujdesin shëndetësor në spital dhe fatmirësisht ndodhet jashtë rrezikut për jetën. Në lidhje the këtë ngjarje, specialistët e Komisariatit të Policisë Rrugore të Tiranës kanë bërë arrestimin në flagrancë të 20-vjeçarit. Në ndërkohë, materialet procedurale i kanë kaluar Prokurorisë për hetime të mëtejshme dhe zbardhjen e plotë të rrethanave të aksidentit.