Situata alarmante në Gjinar të Elbasanit: Flakët përfshijnë 10 hektarë pyje, nis ndërhyrja nga ajri

Gjendja e krijuar nga flakët në zonën pyjore të Njësisë Administrative Gjinar në Elbasan është përkeqësuar ndjeshëm gjatë orëve të fundit, ku vatra e zjarrit ka kapluar rreth 10 hektarë sipërfaqe. Për të vënë nën kontroll situatën në terrenet e thepisura ku efektivët tokësorë e kanë të pamundur të ndërhyjnë, rreth mesditës është angazhuar edhe helikopteri, i cili po operon nga ajri në zonat e Çauthit, Pashtreshit, Bregut të Madh, Koritës dhe Lugut të Thellë. Operacioni për shuarjen e flakëve mobilizon një numër të lartë personeli në terren, ku po punojnë rreth 15 zjarrfikës të Shërbimit Zjarrfikës të Elbasanit, 70 punonjës të Bashkisë së Elbasanit, si dhe 30 trupa nga Forcat e Armatosura. Era e fortë që ka mbretëruar gjatë natës ka favorizuar riaktivizimin dhe avancimin e flakëve, duke e bërë edhe më sfiduese punën e ekipeve operacionale. Autoritetet e emergjencave civile mbeten të angazhuara në terren për të bërë të mundur izolimin e plotë të vatrave dhe garantimin e sigurisë për zonën e banuar dhe turistike të Gjinarit.