A mund të ndjekë Kosova shembullin e Kroacisë? Profesor Kolë Krasniqi analizon mundësitë për mbrojtjen në Hagë

Profesori Kolë Krasniqi ka publikuar një analizë të thelluar mbi modelin kroat të mbështetjes për të akuzuarit para Tribunalit Penal Ndërkombëtar për ish-Jugosllavinë, duke e sjellë këtë përvojë si një pikë krahasimi dhe mundësi të vlefshme për Kosovën dhe ish-udhëheqësit e UÇK-së që poballafaqohen me drejtësinë në Hagë. Sipas analizës së Krasniqit, shteti kroat pati ofruar ndihmë përmes disa mekanizmave konkretë, ku përfshiheshin mbulimi i shpenzimeve financiare të mbrojtjes juridike, sigurimi i qasjes në arkivat dhe dokumentacionin shtetëror, si dhe bashkërendimi institucional për të mbrojtur pozicionin e shtetit para Tribunalit. Qëllimi kryesor i kësaj qasjeje ishte garantimi i kushteve për një mbrojtje sa më profesionale, efektive dhe respektimi i plotë i parimeve të një procesi të drejtë gjyqësor. Duke iu referuar rasteve konkrete historike, si ai i gjeneralit Tihomir Blaškić, autoritetet në Zagreb kishin ndarë fonde nga rezervat buxhetore për të ndihmuar shpenzimet e avokatëve dhe familjeve të të akuzuarit. Megjithatë, Krasniqi vëren se këto mbështetje financiare duhet të kuptohen në kontekstin e tyre të plotë dhe nuk përbëjnë domosdoshmërisht shifra të izoluara vetëm për një individ të vetëm. Një tjetër element kyç i nxjerrë në pah nga eksperienca kroate është mundësia që u është dhënë ekipeve mbrojtëse për të shqyrtuar dokumentacionin zyrtar shtetëror, duke ndihmuar në verifikimin e urdhër-urdhrave ushtarakë dhe strukturave të komandimit. Krasniqi përmbyll duke theksuar se këto praktika të kaluara ofrojnë një horizont reflektimi se si institucionet e një shteti mund t'u qëndrojnë pranë qytetarëve të tyre në procese të ndjeshme ndërkombëtare.