Gjiganti madrilen piketon talentin e re të Premier Ligës, çmimi mund të kapë shifrën e 70 milionë eurove

Klubi i Real Madridit mbetet i përqendruar në gjetjen e një mesfushori të ri, ndërsa në radhët e opsioneve të tyre është shfaqur një emër i freskët nga elitës e futbollit anglez. Çështja e përforcimit të repartit të mesfushës vazhdon të jetë prioritet për drejtuesit e skuadrës madrilene në merkatot e ardhshme, qoftë gjatë janarit apo në verën e vitit 2027. Pavarësisht ndryshimeve në stol, mangësitë e vërejtura në këtë zonë të fushës gjatë sezoneve të kaluara vijojnë të mbeten ende sfidë e hapur për klubin. Për këtë arsye, drejtuesit e Real Madridit po analizojnë me kujdes alternativa të ndryshme në tregun ndërkombëtar. Edhe pse Martin Zubimendi është lakuar shpesh në media, së fundmi radarët e klubit janë drejtuar nga një tjetër mesfushor i Premier Ligës. Sipas gazetarit Latigo Serrano, gjiganti spanjoll po ndjek nga afër situatën e Alex Scott, 23-vjeçarit që aktivizohet te Bournemouthi. Lojtari anglez është i lidhur me një kontratë me Bournemouthin deri në vitin 2028, por drejtuesit e klubit anglez mund të vendosin për ta shitur atë në verën e vitit 2027, për të siguruar fitime financiare para se të hyhet në vitin e fundit të marrëveshjes. Interesimi i madrilenëve për Scott nuk është një risi; sipas të njëjtit burim, drejtuesit e Realit kishin pyetur për gjendjen e tij edhe gjatë bisedimeve me Bournemouthin për transferimin e Dean Huijsen. Gjatë atyre bisedimeve, drejtuesit e klubit nga Premier Liga kishin premtuar se do t'i njoftonin madrilenët nëse lojtari do të dilte në shitje. Gjithsesi, për të siguruar firmën e tij, Real Madridi do të duhet të fitojë garën kundër konkurrencës së fortë. Si Liverpooli ashtu edhe Chelsea e kanë monitoruar prej kohësh 23-vjeçarin, madje blutë e Londrës patën formuluar një ofertë gjatë merkatos verore, e cila u hodh poshtë nga Bournemouthi. Klubi londinez synon që ta provojë sërish fatin e tij me një tjetër ofertë gjatë afatit kalimtar të janarit.