“Ishalla i gjejmë një burrë!” – Biseda e ëmbël në shqip mes Bebe Rexhës dhe kushëririt të vogël bëhet virale

Këngëtarja me famë botërore, Bebe Rexha, ka ndarë me fansat e saj një çast mjaft simpatik nga ambienti familjar, teksa shfaqet duke bashkëbiseduar në gjuhën shqipe me kushëririn e saj tetëvjeçar. Nëpërmjet një videoje të shpërndarë në InstaStory, artistja shqiptaro-amerikane dëgjohet duke i kërkuar llogari djaloshit për një deklaratë që ai kishte bërë pak kohë më parë, situatë kjo që ka prodhuar momente humori mes tyre. “Qysh ke thënë, ‘ishalla do t’i gjejmë Bebes një burrë’? Pse? Se jam e vjetër pak a?”, i drejtohet ajo të voglit me nota humori gjatë bisedës. Më tej, ylli i muzikës e pyet për moshën e tij dhe, pasi merr përgjigjen se ai është tetë vjeç, e komplimenton atë në gjuhën shqipe duke i thënë: “Sa i mençur”. Kjo video ka kapur vëmendjen e ndjekësve në rrjetet sociale, duke dëshmuar edhe një herë dashurinë e pakushtëzuar dhe lidhjen e fortë që këngëtarja ruan me gjuhën dhe rrënjët e saj. E rritur në një familje tradicionale shqiptare në New York, Bebe Rexha nuk ka hezituar kurrë që ndër vite të shprehë publikisht krenarinë e saj për origjinën dhe kulturën e vendit të saj të parëve.