“Jo në emrin tim”: Diaspora shqiptare në Berlin ngrihet në protestë kundër vendimit të Gjykatës Speciale

Diaspora shqiptare në Gjermani ka organizuar sot, më 4 tetor, një tubim protestues para ndërtesës së Parlamentit gjerman në Berlin, nën thirrjen “Jo në emrin tim”. Kjo protestë vjen si shenjë e qartë pakënaqësie ndaj vendimit dënues të Gjykatës Speciale ndaj ish-udhëheqësve të Ushtrisë Çlirimtare të Kosovës. Sipas njoftimit zyrtar, tubimi nisi në orën 12:00 pranë objektit ikonik të Reichstagsgebäude, në adresën Platz der Republik 1. Ky organizim nga bashkatdhetarët pason një protestë të ngjashme që u mbajt ditën e djeshme në qytetin e Munihut. Ndërkohë, vala e pakënaqësisë shtrihet edhe në Kosovë, ku sot do të mbahet protesta e 19-të me radhë në sheshin “Skënderbeu” në Prishtinë, duke filluar nga ora 19:00. Përmes kësaj proteste, krahas kundërshtimit të aktgjykimit, po kërkohet nga Kuvendi i Kosovës që të miratojë Projektligjin për ndryshimin e Ligjit për Gjykatën Speciale. Këto tubime vijnë si reagim ndaj vendimit të datës 16 shtator, kur Dhomat e Specializuara në Hagë shpallën aktgjykimin e shkallës së parë, duke dënuar me gjithsej 81 vjet burgim figurat kryesore të UÇK-së: Hashim Thaçin, Jakup Krasniqin, Kadri Veselin dhe Rexhep Selimin.