Sherr me armë zjarri në Prizren: Tre të arrestuar pasi përleshja fizike përfundoi me një të plagosur

Një incident i rëndë ka ndodhur mbrëmjen e kaluar në rrugën "Faik Konica" në Prizren, ku një konflikt verbal mes tre personave ka degraduar në dhunë fizike dhe përdorim të armës së zjarrit, duke lënë një person të plagosur dhe tre të tjerë në pranga. Sipas informacioneve zyrtare nga Policia, përleshja nisi pas një mosmarrëveshjeje të çastit mes të dyshuarve. Gjatë përleshjes e sipër, njëri prej tyre ka nxjerrë një armë zjarri. Në përpjekje për t'ia hequr armën nga dora, një tjetër person ka ndërhyrë, moment ky kur arma ka shkrepur duke plagosur njërin nga protagonistët e sherrit në dorën e majtë. Autoritetet policore sqaruan dinamikën e ngjarjes përmes një komunikate zyrtare: “Pas një mosmarrëveshjeje, të dyshuarit janë rrahur në mes vete, ku njëri nga të dyshuarit kishte ekspozuar një armë. I dyshuari tjetër reagon duke ia kapur armën dhe gjatë ballafaqimit me të shkrepet arma”. I plagosuri është transportuar me urgjencë për të marrë ndihmën e nevojshme mjekësore. Ndërkohë, organet e rendit kanë iniciuar rastin nën dyshimet për kryerjen e veprave penale “Shkaktim i rrezikut të përgjithshëm” si dhe “Armëmbajtje pa leje”. Pas kryerjes së procedurave të intervistimit, me vendim të prokurorit të shtetit, të tre personat e përfshirë në këtë incident janë dërguar në mbajtje.